Xaricdə təhsil almaq istəyənlər üçün sənəd qəbulunun tarixi yaxın günlərdə açıqlanacaq
12.03.2025 / Maraqlı məlumatlar
“Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-ci illər üçün Dövlət Proqramı” çərçivəsində qəbul üçün seçim hər il tədris başlamadan 6 ay öncə başlayır. Bu da o deməkdir ki, yaxın günlərdə qəbulun tarixi ictimaiyyətə açıqlanacaq”.
Bunu “Azərbaycan müəllimi”nə açıqlamasında Dövlət Proqramı İdarəetmə Qrupunun rəhbəri Turan Topalova deyib. Onun sözlərinə görə, hər üç – bakalavriat, magistratura və doktorantura səviyyələri üzrə qəbul elektron qaydada, portal.edu.az səhifəsində şəxsi kabinet yaratmaqla həyata keçiriləcək. Sənədlərini uğurla təqdim edən namizədlər növbəti mərhələ olan müsahibəyə dəvət ediləcəklər:
“Dövlət Proqramına müraciət etmək üçün xarici ali təhsil müəssisəsindən qəbul sənədi olmalıdır. Sənəd Elm və Təhsil Nazirliyinin ötən ilin sonlarında açıqlanan siyahısındakı ali təhsil müəssisələrindən alınmalıdır. Doktorantura təhsil səviyyəsi üzrə həmin siyahıda yer alan 221 ali təhsil müəssisəsindən 15 prioritet istiqamət üzrə qəbul əldə etmiş namizədlər Dövlət Proqramına müraciət edə bilərlər.
Universitetlər üzrə reytinq cədvəlləri əsas götürülərək, ilk onluqda yer alan təhsil müəssisələri istənilən ixtisas üzrə Dövlət Proqramına qəbul əldə etmiş namizədlərin Dövlət Proqramına müraciət etmək imkanı olacaq.
Qeyd edək ki, ümumilikdə hər il 500 nəfərin təhsilinin Dövlət Proqramı hesabına maliyyələşdirilməsi nəzərdə tutulur.
