Mühəndislik problemlərinin həllinə həsr olunan beynəlxalq konfrans davam edir
14.03.2025 / Mühüm xəbərlər
Bakı Mühəndislik Universitetində (BMU) keçirilən “Mühəndislik Problemlərinin Həllində Menecment və İdarəetmə” adlı beynəlxalq konfrans (MaCoSEP- 2025, 13-15 mart ) bu gün öz işini panel iclasla davam etdirib.
Konfransda Estoniyanın Tartu Universitetinin professoru Sedat Akleylekin “Post-kvant kriptoqrafiyasında çətinliklər və imkanlar”, İtaliyanın Palermo Universitetinin professoru Calogero Vetronun “Qeyri-xətti çoxdəyərli sistemlər: mövcudluq və relaksasiya teoremləri” və Hindistanın Rajagiri Mühəndislik və Texnologiya Məktəbinin professoru Sunny Joseph Kalayathankalın “Qeyri-səlis modelləşdirmə və qərarvermə tətbiqlərinin real dünyada istifadəsi” adlı məruzələri dinlənilib.
Müzakirələrdən sonra məruzəçilərə təşəkkür plaketləri təqdim edilib.
Martın 15-də başa çatacaq konfransın ikinci gününün bölmə iclasları “Ekologiya, kimya mühəndisliyi və biotexnologiyada sistem təhlili”, “Radiotexnika və telekommunikasiya”, “Ağıllı texnologiyalar və kiberfiziki sistemlər”, “Elektrik enerji sistemləri və şəbəkələri” mövzularına həsr olunub.
