Google, ödənişli YouTube Premium xidmətinə abunə olan istifadəçilər üçün məhdud təcrübə çərçivəsində yeni bir funksiyanı istifadəyə verib. Bu funksiya abunəçilərə hər ay digər istifadəçilərlə 10-a qədər reklamsız video paylaşmağa imkan verir - yalnız o şərtlə ki, həmin istifadəçilər YouTube Premium-un əlçatan olduğu bir bölgədə yaşasınlar. Premium abunəçisi olmayan dostlar da bu bağlantılardan istifadə edərək məzmunu reklamsız şəkildə, elə ödənişli istifadəçilər kimi izləyə biləcəklər. YouTube-da “Share” düyməsinə kliklədikdə, təcrübə iştirakçıları üçün “Share ad-free” seçimi əlçatan olacaq.

Onlar hər ay 10 videoya qədər reklamsız baxış üçün keçid yarada biləcəklər və dostları bu videolara reklamsız baxa biləcəklər. Əgər istifadəçi bu keçidi təsadüfən artıq Premium abunəliyi olan biri ilə paylaşsa, həmin baxış limiti hesablanmayacaq. Həmçinin videonu bir nəfərlə və ya bir neçə nəfərlə paylaşmağınız fərq etmir - bu 10 reklamsız baxış bütün alıcılar arasında bölüşdürülür. Qeyd etmək lazımdır ki, təcrübə iştirakçıları demək olar ki, bütün videoları paylaşa biləcəklər, lakin bu imkan musiqi məzmunu, YouTube Originals, Shorts, canlı yayımlar, filmlər və şoulara şamil olunmur. Hal-hazırda Google bu yeni funksiyanı Argentina, Braziliya, Kanada, Meksika, Türkiyə və Birləşmiş Krallıqda sınaqdan keçirir və o, yalnız az sayda Premium abunəçiyə əlçatandır.