Çin yeni beyin çipi sınağına başlayıb
03.04.2025 / Maraqlı məlumatlar
Çinin Beyin Tədqiqatları İnstitutu (CIBR) və “NeuCyber NeuroTech” şirkətinin alimləri “Beinao N.1” adlı beyin çipinin klinik sınaqlarına başlayıblar.
“Azərbaycan müəllimi” “Reuters”ə istinadən xəbər verir ki, hazırda implant üç xəstəyə quraşdırılıb və ilin sonuna kimi daha on könüllünün əməliyyatı planlaşdırılır.
Proses bu sürətlə davam etsə, Çinin bu layihəsi xəstələrin sayına görə İlon Maska məxsus ABŞ-nin “Neuralink” şirkətini qabaqlaya bilər.
“Beinao No.1” “Neuralink” çipi ilə müqayisədə toxuma zədələnməsi riskini azaldan minimal invaziv simsiz çipdir. Artıq gələn il lazımi icazələri aldıqdan sonra tərtibatçılar klinik sınaqları genişləndirməyi, iştirakçıların sayını 50 xəstəyə çatdırmağı planlaşdırırlar.
Bununla paralel olaraq, yeni nəsil çip – “Beinao No.2” də hazırlanır. Həmin çipin sınaqları növbəti 12-18 ay ərzində planlaşdırılır. Tədqiqatçılar vurğulayırlar ki, layihə yalnız iflicdən əziyyət çəkən insanlara kömək etmək məqsədi daşıyır.
