Windows 11 yaxın zamanda yenilənmiş Styart menyusunu əldə edəcək
07.04.2025 / Maraqlı məlumatlar
Şəbəkə mənbələrinin verdikləri məlumata görə, Microsoft şirkəti Windows 11-də Start menyusunun əhəmiyyətli dərəcədə yenilənməsi üzərində çalışır. Gözlənildiyinə görə, bu yeniləmə “Pinned” və “Recommended” bölmələrini tətbiqlər siyahısı ilə birləşdirərək vahid interfeys daxilində təqdim edəcək. Bundan əlavə, Start menyusu daha geniş olacaq, bu da daha çox tətbiqin sabitlənməsinə imkan verəcək və bu bölmədəki bütün elementlər avtomatik şəkildə göstəriləcək. Yenilənmiş Start menyusu elementlərin görünüşünü fərdiləşdirmək baxımından daha çox imkanlar təqdim edəcək.
Məsələn, istifadəçilər adətən yeni quraşdırılmış tətbiqlər və ya son açılmış faylların göstərildiyi “Recommended” bölməsini sabitlənmiş tətbiqlərin altından tamamilə silə biləcəklər. Yeni Start menyusunu Windows Insider öncədən qiymətləndirmə proqramı iştirakçıları üçün əlçatan olan Windows 11-in son beta versiyasında ilk görənlərdən biri sosial şəbəkə X istifadəçisi @phantomofearth olub və o bu barədə öz səhifəsində məlumat paylaşıb. Yenilənmə hələ rəsmi şəkildə elan olunmayıb, lakin Microsoft-un illik Build inkişaf etdirici konfransının may ayında keçiriləcəyini nəzərə alsaq, yaxın həftələrdə proqram nəhənginin yeni Start menyusu barədə daha ətraflı məlumat verəcəyi gözlənilir.
