OpenAI əvvəlcə öz məntiqi düşünmə bacarığına malik o3 modelini fevral ayında geniş şəkildə istifadəyə verməyi planlaşdırırdı, lakin sonra bu prosesi qeyri-müəyyən vaxta qədər təxirə saldı. İndi isə şirkət tam əmindir ki, həm o3 modeli, həm də növbəti nəsil olacaq o4-mini modeli “bir neçə həftə ərzində” ictimaiyyətə təqdim olunacaq. Bu barədə OpenAI-nin baş direktoru Sam Altman sosial şəbəkə X-də məlumat verib. O həmçinin GPT-5 modelinin niyə yalnız “bir neçə ay sonra” əlçatan olacağını izah edib. Altman-ın sözlərinə görə, bu qərar OpenAI-nin “GPT-5-i əvvəl düşündüyümüzdən daha yaxşı etmək istəyi” ilə bağlıdır.

GPT-5 məntiqi düşünmə qabiliyyətini də əhatə edən vahid bir model olmalıdır. “Biz həmçinin müəyyən etdik ki, bütün bu imkanları problemsiz şəkildə birləşdirmək düşündüyümüzdən daha çətindir. Və biz əmin olmaq istəyirik ki, gözlənilən misilsiz tələbatı qarşılayacaq qədər güclü texniki imkanlarımız var” - deyə Altman izah edib. Model istifadəyə verildikdən dərhal sonra OpenAI onu “zəkanın standart ayarları” ilə və “sui-istifadə hədləri” nəzərə alınmaqla məhdudiyyətsiz şəkildə təqdim etməyi planlaşdırır.

     

Altman-ın sözlərinə görə, ChatGPT Plus abunəçiləri GPT-5 ilə “daha yüksək zəka səviyyəsində”, ChatGPT Pro abunəçiləri isə “daha da yüksək zəka səviyyəsində” işləyə biləcəklər. “GPT-5 səs, interaktiv kanvas, axtarış, dərin araşdırmalar və daha çox funksiyanı özündə birləşdirəcək” - deyə Altman bu ilin əvvəlində bildirmişdi. “Bizim əsas məqsədimiz modellərimizi birləşdirərək elə sistemlər yaratmaqdır ki, bu sistemlər bütün alətlərimizi istifadə edə bilsin, nə vaxt uzun müddət düşünmək, nə vaxt isə düşünmədən hərəkət etmək lazım olduğunu bilsin və ümumilikdə çox geniş spektrli tapşırıqlarda faydalı olsunlar”.