Günəş panelli pəncərələr üçün yeni rekord qeydə alınıb
26.03.2025 / Maraqlı məlumatlar
Danimarkalı tədqiqatçılar eyni zamanda işığın keçməsinə imkan verən və günəş işığını elektrik enerjisinə çevirən yeni pəncərələr üzrə dünya rekordu qırıblar.
CitySolar layihəsindən olan bu innovasiya göydələnlərin və ofislərin pəncərələrini günəş panelləri kimi istifadə etməyə imkan verərək binaları elektrik stansiyalarına çevirə bilər. Layihə Avropaya bütün yeni tikililəri demək olar ki, sıfır enerjili etmək və 2050-ci ilə qədər tikinti sektorunu tamamilə karbonsuzlaşdırmaq məqsədinə çatmağa kömək edə bilər.
Cənubi Danimarka Universitetinin tədqiqatçıları üzvi günəş batareyalarını perovskit materialı ilə birləşdirərək 12,3 faiz səmərəliliyə nail olublar ki, bu da kommersiya günəş batareyalarına bərabərdir. Beynəlxalq komanda panellərin 30 faiz şəffaf olduğunu da bildirir. İndiyə qədər şəffaf günəş pəncərələri kifayət qədər enerji toplaya bilmirdi və istifadə üçün yetərincə şəffaf deyildi. Lakin CitySolar layihəsi bu problemləri həll edib.
Layihənin əsas tədqiqatçılarından biri, professor Morten Madsen bildirib ki, “şəffaf günəş batareyaları inteqrasiya olunmuş enerji həllərində növbəti böyük addım ola bilər”. O qeyd edib ki, müasir ofis binalarındakı böyük şüşə fasadlar əlavə yer və struktur dəyişiklikləri tələb etmədən enerji istehsalı üçün istifadə oluna bilər.
Madsen həmçinin istifadə olunan materialların münasib qiymətə malik olduğunu və kommersiya tətbiqi üçün genişləndirilə biləcəyini vurğulayıb. “Tandem günəş elementləri enerjini əsasən infraqırmızı və ultrabənövşəyi şüalardan toplayır, lakin görünən işıqdan deyil. Bu, yarı şəffaf günəş pəncərələri üçün yeni səmərəlilik standartları təyin etməyə imkan verir”, – deyə o bildirib.
Layihə hazırda konsepsiyanın sübutu və prototip mərhələləri arasında yer alır. Avropa İttifaqından təxminən 4 milyon avro maliyyə dəstəyi alan komanda şəffaf günəş panellərinin istehsalını genişləndirmək üçün sənaye tərəfdaşları ilə danışıqlar aparır.
