The Verge xəbər verir ki, The New York Times, The Washington Post və The Guardian da daxil olmaqla yüzlərlə media şirkəti, süni zəkanın nəzarətsiz istifadəsindən kontenti qorumaq üçün ABŞ hökumətinə çağırış edən reklam kampaniyasına start veriblər. “Support Responsible AI” (Məsuliyyətli süni zəkanı dəstəkləyin) adlı bu təşəbbüs News/Media Alliance assosiasiyası tərəfindən təşkil olunub və həm çap, həm də onlayn nəşrlərdə elanlarla müşayiət olunur. Kampaniya, OpenAI və Google-un süni zəka modellərinin müəllif hüquqları ilə qorunan materiallar əsasında öyrədilməsinə icazə verilməsi üçün hökumətə müraciət etdikləri məktublardan bir neçə həftə sonra başlayıb.

Reklamlarda belə şüarlardan istifadə olunur: “Süni zəkaya nəzarət edin”, “Süni zəka oğurluğunu dayandırın”, “Süni zəka sizdən də oğurlayır” - və bütün bu mesajların sonunda belə bir çağırış yer alır: “Oğurluq amerikalılara yaraşmaz. Vaşinqtona deyin ki, texnologiya nəhəngləri nəşriyyatlardan aldıqları kontentə görə ödəniş etsinlər”. “Hazırda böyük texnologiya şirkətləri və süni zəka şirkətləri nəşriyyatların kontentlərini onların özlərinə qarşı istifadə edirlər - yəni bu kontenti icazə və ödəniş olmadan götürürlər və süni zəka modellərini öyrətmək üçün istifadə edirlər. Nəticədə isə bu modellər yaradıcıların reklam gəlirlərini tamamilə öz üzərlərinə çəkirlər” - deyə News/Media Alliance təşkilatının prezidenti və baş direktoru Danielle Coffey bildirib.

   

“O vurğulayıb ki, media sənayesi süni zəkaya qarşı deyil - bir çox şirkət bu alətlərdən özü də istifadə edir. Amma biz məsuliyyətli şəkildə inkişaf edən, balanslı bir ekosistem istəyirik”. Fevral ayında oxşar bir kampaniyanı böyük Britaniya qəzetləri keçirmişdi - qəzetlərin birinci səhifələrində “Make It Fair” (Ədalətli edin) şüarı yer almış və süni zəka modellərinin öyrədilməsində müəllif hüquqlarının qorunmasına çağırış edilmişdi.

Bugünkü təşəbbüsə qoşulanlar arasında The Atlantic, Seattle Times, Tampa Bay Times, Conde Nast (Wired jurnalının nəşriyyatçısı) və Axel Springer (Politico-nun sahibi) də var. Aydındır ki, media şirkətləri ilə texnologiya nəhəngləri arasında qarşıdurma getdikcə kəskinləşir. OpenAI və Google ABŞ hökumətindən süni zəkanın öyrədilməsi üçün məlumatlara sərbəst çıxış əldə etməyə çalışdığı halda, nəşriyyatlar bu materialların istifadəsi üçün qanuni tənzimləmə və ödənişlərin tətbiq olunmasında israr edirlər. Neyron şəbəkələr dövründə bu mübarizənin nəticəsi rəqəmsal kontentin gələcəyini müəyyən edə bilər.