Microsoft Windows üçün Copilot tətbiqinin növbəti yeniləməsini sınaqdan keçirməyə başlayıb. Bu yeniləmə süni zəka köməkçisinə kompüter ekranındakı görüntünü və orada açılmış tətbiqlərin interfeysini izləməyə imkan verəcək. İlkin mərhələdə Copilot Vision funksiyası yalnız Edge brauzeri ilə məhdudlaşırdı, lakin indi bu imkan istənilən kompüter tətbiqinə şamil edilir. Copilot Vision istifadəçiyə Adobe Photoshop-un necə işlədiyini başa düşməkdə, açılmış fotoşəkilləri və ya veb-səhifələri analiz etməkdə kömək edə bilər.

Microsoft-un 50 illiyinə həsr olunmuş tədbirdə şirkət nümayiş etdirdi ki, bu köməkçi Minecraft oyununda dəstək göstərir və Clipchamp videomontaj proqramında ayarları optimallaşdırmağa kömək edir. Copilot Vision-un ilkin versiyasını yalnız ABŞ-dakı Windows Insider proqramı iştirakçıları test edə bilirlər. Copilot ekranın müəyyən hissələrini işıqlandıra bilər ki, bu da istifadəçiyə müxtəlif proqramların interfeysində daha rahat naviqasiya etməyə kömək edir. Praktikada bu funksiya bir qədər Recall funksiyasına bənzəyir - Recall avtomatik olaraq ekran görüntüləri yaradır və bu görüntülər üzrə axtarış etməyə imkan verir. Eyni zamanda, bu, Microsoft Teams vasitəsilə ekranın yayımlanmasına da oxşayır.

Windows üçün Copilot-da həmçinin süni zəka əsaslı fayl axtarışı funksiyasının testinə start verilib - bu funksiya köməkçiyə faylların məzmunu ilə bağlı suallar verməyə imkan yaradır. Bu mövzuda növbəti formatlar dəstəklənir: .DOCX, .XLSX, .PPTX, .TXT, .PDF və .JSON. Hər iki funksiya yalnız Copilot Plus PC modelləri üçün deyil, Windows üçün Copilot-u olan bütün kompüterlər üçün əlçatandır. Copilot Vision funksiyası həmçinin iOS və Android tətbiqlərində də mövcuddur. Kompüterlərdə bu funksiya hələlik Windows Insider proqramı çərçivəsində test olunur, lakin yaxın həftələrdə və ya aylarda ümumi istifadəyə təqdim oluna bilər.