2024-cü ilin sonunda Google, Samsung və Qualcomm ilə əməkdaşlıq çərçivəsində hazırlanmış Android XR əməliyyat sistemini təqdim etdi. Android XR platforması süni zəkanı, artırılmış reallığı (AR) və virtual reallığı (VR) bir araya gətirərək genişləndirilmiş reallıq (XR, extended reality) qurğuları ilə qarşılıqlı əlaqəni mümkün edir. Bu gün TED2025 tədbirində Android XR-ın rəhbəri Shahram Izadi öz çıxışı zamanı cihazın bəzi funksiyalarını nümayiş etdirmək üçün XR eynəklərinin prototipindən istifadə edib. Google, Android XR üçün xüsusi olaraq Maps, YouTube, Chrome və digər tətbiqlərin XR versiyalarını hazırlayıb.

Hazırda şirkət XR rejimində çoxpəncərəli brauzer versiyası üzərində işləyir və Google Play-dəki mövcud tətbiqlərin dəstəklənməsini təmin etməyə çalışır. İnterfeysindən əlavə, Android XR adi əməliyyat sistemindən Gemini adlı multimodal süni zəka modelinə əsaslanan genişləndirilmiş funksiyalar toplusu ilə fərqlənir. Google-un sözlərinə görə, bu model XR cihazlarının funksionallığını əhəmiyyətli dərəcədə artıracaq. Hazırda Google və Samsung süni zəka sahəsində Google-un son nailiyyətlərindən istifadə edərək Android XR əməliyyat sistemi ilə işləyən cihazlar üzərində işləyirlər.

Google diqqətini eynək form-faktoruna yönəldib, Samsung isə Apple Vision Pro-ya bənzər bir cihaz hazırlayır. Hazırda Android XR əsaslı Google cihazları barədə çox az məlumat var, lakin İzadinin bu eynəklərlə çıxış etməsi şirkətin bu sahədəki ciddi niyyətlərini təsdiqləyir. Izadi-nin istifadə etdiyi eynək daha əvvəl internetə sızmış prototip şəkillərindən fərqlənmir. Çıxış zamanı fars dilindən ingilis dilinə tərcümə prosesi, şəkillərin tanınması və Android cihazları ilə eynəklər arasında qarşılıqlı əlaqə nümayiş etdirilib. Android XR əməliyyat sistemi ilə işləyən istehlakçı məhsullarının satışa çıxarılma vaxtı ilə bağlı hələlik konkret bir məlumat verilməyib.