OpenAI rəsmi olaraq yeni süni zəka modeli GPT-4.1-i təqdim edib. Bu model ötən il istifadəyə verilmiş multimodal GPT-4o modelinin davamçısıdır. Şirkətin məlumatına görə, yeni süni zəka modeli daha böyük kontekst pəncərəsinə malikdir və ümumilikdə GPT-4o-nu “demək olar ki, bütün parametrlər üzrə” üstələyir. Bundan əlavə, modelin proqramlaşdırma kodu yazmaq və təlimatlara əməl etmək qabiliyyətləri də təkmilləşdirilib. GPT-4.1 artıq tərtibatçılar üçün istifadəyə verilib və onunla birlikdə daha kiçik ölçülü iki versiya da təqdim olunub - GPT-4.1 mini və GPT-4.1 nano.

 

     

OpenAI-nin sözlərinə görə, nano versiyası “ən kiçik, ən sürətli və ən ucuz” süni zəka modelidir. GPT-4.1-in bütün 3 versiyası multimodal xarakter daşıyır, yəni təkcə mətnlə deyil, həm də digər məlumat növləri ilə - məsələn, şəkillər və ya videolarla - işləyə bilir. Modelin kontekst pəncərəsinin ölçüsü 1 milyon tokenə qədər artırılıb ki, bu da GPT-4o-nun 128 000 tokenlik pəncərəsi ilə müqayisədə əhəmiyyətli dərəcədə böyükdür. Qeyd olunur ki, GPT-4.1 istifadəçi ilə qarşılıqlı əlaqə müddətində kontekst pəncərəsindəki məlumatı yüksək keyfiyyətlə işləyə bilir. OpenAI bildirib: “Biz bu modeli GPT-4o ilə müqayisədə daha etibarlı şəkildə, həm uzun, həm də qısa kontekst hissələrində diqqəti yayındıran elementləri gözardı edərək, mətnin aktual hissələrini tanımağa öyrətmişik”.

Bundan əlavə, GPT-4.1 modeli GPT-4o-dan 26% daha ucuzdur ki, bu da Çin şirkəti DeepSeek tərəfindən təqdim olunan yüksək effektivli süni zəka modelinin istifadəyə verilməsindən sonra xüsusilə vacib göstəriciyə çevrilib. GPT-4.1-in istifadəyə verilməsi OpenAI-nin 2 il əvvəlki GPT-4 modelindən imtina etməyə hazırlaşdığı dövrə təsadüf edir. Rəsmi məlumatlara görə, 30 apreldən sonra GPT-4o modeli GPT-4-ün “təbii davamçısı” olacaq. Həmçinin, OpenAI 14 iyul tarixində API vasitəsilə təqdim olunan GPT-4.5 modelinə çıxışı dayandıracaq, çünki “GPT-4.1 bir çox əsas funksiyalar baxımından daha yaxşı və ya eyni səviyyədə performans göstərir, lakin onun xərcləri və resurs istifadəsi xeyli azdır”.