OpenAI şirkəti sosial şəbəkə bazarına daxil ola bilər. ChatGPT-nin yaradıcıları, bəlkə də müəyyən mənada X sosial şəbəkəsini xatırladacaq bir layihə üzərində çalışırlar. Əsas məqsəd, Meta və X platformalarının artıq etdiyi kimi, süni zəkanı unikal məlumatlar üzərində öyrətmək imkanıdır. Layihə hələ erkən mərhələdədir, lakin The Verge-in məlumatına görə, şirkət daxilində istifadəçilərin ChatGPT tərəfindən yaradılan şəkilləri paylaşa biləcəyi lentə sahib prototip artıq hazırlanıb. OpenAI-nin baş direktoru Sam Altman müstəqil mütəxəssisləri bu ideyanı müzakirə etməyə çağırıb.

Lakin hələlik məlum deyil ki, bu tətbiq ayrıca olacaq, yoxsa ChatGPT-yə inteqrasiya ediləcək. Sosial şəbəkənin istifadəyə verilməsi Altman ilə Elon Musk arasında qarşıdurmanı daha da gücləndirə bilər. Qeyd edək ki, fevral ayında Musk, OpenAI-ni 97.4 milyard dollara almağı təklif etmişdi, Altman isə belə cavab vermişdi: “Yox, təşəkkürlər, amma biz öz növbəmizdə Twitter-i 9.74 milyard dollara ala bilərik”. Eyni zamanda, analitiklərin fikrincə, OpenAI Meta ilə birbaşa rəqabətə girə bilər. Çünki şayiələrə görə, Meta süni zəka köməkçisi və sosial lentə sahib ayrıca bir tətbiq üzərində işləyir.

     

Qeyd edək ki, Meta tətbiqi barədə ilk məlumatlar yayıldığı zaman, Altman X sosial şəbəkəsində öz sosial platformalarını yaratma ehtimalını istisna etmədiyini bildirən paylaşım etmişdi. OpenAI-nin öz sosial şəbəkəsinə sahib olması, şirkətə real vaxt rejimində unikal məlumatlar toplamağa imkan verərdi - bu, X və Meta-nın artıq öz platformalarında istifadəçi tərəfindən yaradılmış açıq kontent əsasında süni zəka modellərini öyrətmək üçün etdiyi yanaşmadır. Hələ dəqiq bilinmir ki, OpenAI-nin bu layihəsi şirkətin laboratoriyasından kənara çıxacaq, ya yox.