Azərbaycan İƏT-in ali təhsil üzrə ekspert görüşündə təmsil olunub
18.04.2025 / Maraqlı məlumatlar
15-16 aprel tarixində Elm və Ali Təhsil üzrə Dövlət Agentliyinin Beynəlxalq əməkdaşlıq şöbəsinin müdiri Müjdat Həsənov Pakistanın İslamabad şəhərində keçirilən İqtisadi Əməkdaşlıq Təşkilatı (İƏT) regionunda Ali Təhsilin Beynəlmiləlləşdirilməsi üzrə 1-ci İƏT-EI Ekspert Qrupunun iclasında iştirak edib.
Tədbirdə İƏT-in baş katibi Əsəd Məcid Xan, Pakistanın Ali Təhsil Komissiyasının rəhbəri Muxtar Əhməd, İƏT Təhsil İnstitutunun direktoru Mehmet Akif Kireçci, eləcə də Türkiyə, İran, Türkmənistan və digər üzv ölkələrin ali təhsil sahəsindəki qurumlarının nümayəndələri iştirak ediblər.
İclas zamanı Müjdat Həsənov Azərbaycanda elm və ali təhsilin beynəlmiləlləşməsi sahəsində həyata keçirilən layihələr və onların nəticələri barədə təqdimatla çıxış edib.
Toplantıda həmçinin İƏT Təhsil İnstitutunun direktoru tərəfindən 2025–2030-cu illəri əhatə edən Ali Təhsilin Beynəlmiləlləşdirilməsi üzrə Tədbirlər Planının layihəsi təqdim olunub və onun icrası üzrə əməkdaşlıq alətləri müzakirə edilib.
