Google, ölkələrə məxsus domenləri axtarışlardan çıxarır!
18.04.2025 / Maraqlı məlumatlar
Google bu gün elan edib ki, axtarış təcrübəsini sadələşdirmək üçün artıq ölkə kodu domen adlarından (ccTLD) istifadə etməyəcək. Bunun əvəzinə, bütün axtarış xidmətləri google.com URL-də baş verəcək və yerli nəticələr avtomatik olaraq təqdim ediləcək. Beləliklə, Google yeni qərarı ilə birlikdə ölkələrə məxsus domenləri axtarışlardan çıxararaq avtomatik olaraq nəticələri təqdim edəcək.
Məsələn, google.com.az artıq Azərbaycandakı istifadəçilərin brauzer ünvan çubuğunda görünməyəcək. Bu ölkəyə xas domen uzantılarına malik Google URL-ləri indi əsas google.com ünvanına yönləndiriləcək. Şirkət dəyişikliyin tədricən tətbiq ediləcəyini və proses zamanı bəzi axtarış seçimlərini yenidən daxil etməyiniz xahiş oluna biləcəyini deyir. Google bildirir ki, yeniləmə insanların brauzerin ünvan çubuğunda gördüklərini dəyişəcək, lakin axtarışın necə işlədiyini və ya milli qanunlara əsasən öhdəliklərini dəyişməyəcək.
Xatırladaq ki, 2017-ci ildə Google coğrafiyaya əsaslanan axtarış nəticələrini avtomatik təmin etmək üçün məkan məlumatından istifadə etməyə başlamışdı. Bu dəyişikliklə yerli ölkə kodu URL-inə və ya google.com-a sorğu daxil etməyin heç bir fərqi yoxdur və siz həmişə fiziki yerinizə xas olan nəticələri görəcəksiniz. Ona görə də ölkə domen adlarına ehtiyac artıq aradan qalxmışdı.
