III “Maarifçi” tələbə-məzun təcrübə proqramına qeydiyyat müddəti başa çatıb
21.04.2025 / Maraqlı məlumatlar
Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə həyata keçirilən III “Maarifçi” tələbə-məzun təcrübə proqramına qeydiyyat prosesi yekunlaşıb.
Nazirlikdən “Azərbaycan müəllimi”nə verilən məlumata görə, proqramın məqsədi tələbə və yeni məzun olmuş gənclərə təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmələrinə və peşəkar vərdişlər qazanmalarına dəstək olmaqdır.
Ötən ilin aprel-iyul aylarında baş tutan I “Maarifçi” tələbə-məzun təcrübə proqramında 1958, oktyabr – yanvar aylarında keçirilən II “Maarifçi” proqramında isə 2741 nəfərin müraciəti qeydə alınıb. III “Maarifçi” tələbə-məzun təcrübə proqramında isə müraciət sayı 3542 nəfərə çatıb. Növbəti bir ay ərzində test imtahanı və müsahibə mərhələləsi həyata keçirilməsi nəzərdə tutulub.
Qeyd edək ki, 4 ay davam edəcək “Maarifçi” proqramı çərçivəsində seçilmiş iştirakçılar Elm və Təhsil Nazirliyinin müxtəlif struktur bölmələri və tabe qurumlarında, regional təhsil idarələrində, eləcə də Naxçıvan Muxtar Respublikasının Təhsil Nazirliyində təcrübə keçmək imkanı əldə edəcəklər.
Xatırladaq ki, I və II “Maarifçi” tələbə-məzun təcrübə proqramı çərçivəsində 24 iştirakçı Elm və Təhsil Nazirliyinin tabe qurumlarında, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində işlə təmin olunub.
