OpenAI nümayəndəsi məhkəmədə bildirib ki, əgər Google şirkəti Chrome brauzerini satmağa məcbur edilərsə, şirkət onun alınmasında maraqlıdır. ChatGPT məhsulunun rəhbəri Nick Turley bu açıqlamanı ABŞ-ın Google-a qarşı açdığı antiinhisar işi çərçivəsində verib. Hakimiyyət orqanları hesab edir ki, Chrome-un ayrılması Google-un axtarış xidmətləri bazarındakı dominant mövqeyini zəiflədə bilər. Hakim Amit Mehtadaha əvvəl Google-u onlayn axtarış sahəsində monopolist kimi tanıyıb və hazırda şirkətin təsirini məhdudlaşdırmaq üçün mümkün tədbirlər nəzərdən keçirilir. Google bu qərardan apellyasiya şikayəti verməyə hazırlaşır. Lakin məhkəmə Chrome-un satışına qərar versə, OpenAI onun potensial alıcısı olmağa hazırdır.

Həmçinin məlum olub ki, OpenAI hələ ötən il Google ilə tərəfdaşlıq barədə razılığa gəlməyə çalışıb ki, ChatGPT onun axtarış texnologiyalarından istifadə edə bilsin. Hazırda neyroşəbəkə məlumatları Microsoft-un Bing axtarış sistemindən alır, lakin Turley-in qeyd etdiyi kimi, şirkət “axtarış xidmətlərinin təchizatçısı ilə bağlı ciddi keyfiyyət problemləri” yaşayır. OpenAI tərəfindən məhkəməyə təqdim olunmuş məktubda deyilir: “Əminik ki, Google ilə əməkdaşlıq bizə məhsulu təkmilləşdirməyə kömək edərdi”. Lakin Google bu tərəfdaşlıqdan imtina edib. Eyni zamanda, OpenAI öz axtarış sistemini inkişaf etdirməkdə davam edir, lakin ilkin plan - 2025-ci ilə qədər ChatGPT-nin sorğuların təxminən 80%-ində öz axtarış sisteminə əsaslanacağı - çox optimist olub.

Bu hədəfə yalnız bir neçə ildən sonra çatmaq mümkün olacaq. Mütəxəssislər hesab edirlər ki, OpenAI-nin Chrome-a marağı təkcə axtarışla bağlı deyil, həm də uzunmüddətli strategiya ilə əlaqəlidir. Brauzerə sahib olmaq şirkətə istifadəçilərə və onların məlumatlarına birbaşa çıxış imkanı verərdi ki, bu da Google və Microsoft ilə rəqabətdə onun mövqeyini gücləndirə bilərdi. Hazırda isə hakim qərar verməlidir: Google-un məcburi bölünməsi baş tutacaqmı və Chrome müstəqil aktivə çevriləcəkmi? Əgər Chrome həqiqətən satışa çıxarılarsa, OpenAI əsas iddiaçılardan biri olacaq, lakin bazardakı digər iri oyunçular arasında da onun uğrunda ciddi mübarizənin baş verməsi istisna edilmir.