Google nəhayət ki, Chrome brauzerinin Android üçün nəzərdə tutulmuş versiyasına daxili PDF oxuyucusu əlavə edib. Artıq PDF fayllarını açmaq üçün Google Drive kimi üçüncü tərəf tətbiqlərdən istifadə etməyə ehtiyac qalmayacaq. Chrome Android cihazlarında ən məşhur brauzerlərdən biri olsa da, uzun müddət daxili PDF oxuyucusuna malik deyildi. İndi isə Google bu problemi həll edib və PDF fayllarını birbaşa brauzerdə açmaq funksiyasını əlavə edib.

Əvvəllər Android-də Chrome vasitəsilə yüklənmiş və ya əlaqələndirilmiş bir PDF faylını açmaq istədikdə "Bununla aç" bildirişi çıxırdı və Google Drive kimi üçüncü tərəf tətbiqləri təklif olunurdu. İndi isə Chrome bu faylları birbaşa özündə açır və beləliklə tətbiqdən çıxmağa ehtiyac qalmır. Bu funksiya ilk dəfə ötən ilin fevral ayında aşkar edilmişdi, lakin əvvəlcə işləmirdi. Dekabr ayında Google funksiyanı tədricən aktivləşdirməyə başladı, lakin yalnız indi o, geniş istifadəçi kütləsi üçün əlçatan olub.

Daxili PDF oxuyucu annotasiya, axtarış və digər imkanları dəstəkləyir. İndi sənədlərə şərhlər əlavə etmək mümkündür - bunun üçün karandaş, marker və ya silgi istifadə edilə bilər. Alətlərin xətt qalınlığını və rəngini tənzimləmək imkanı da mövcuddur. Axtarış funksiyası PDF sənədlərində mətn tapmağa imkan verir. Android Authority-nin məlumatına görə, funksiya Android 15 əsasında işləyir, lakin hələlik köhnə Android versiyalarında aktiv deyil. Gözlənilir ki, yaxın günlərdə bu dəstək Android 12 və daha yeni versiyalara da genişləndiriləcək.