Google valideynlər tərəfindən Family Link tətbiqi vasitəsilə idarə olunan cihazlara sahib 13 yaşdan kiçik uşaqlar üçün süni zəka köməkçisi Gemini-yə giriş imkanı açmağa hazırlaşır. Şirkət xəbərdarlıq edib ki, süni zəkanın davranışı bəzən qeyri-proqnozlaşdırıla bilər. Google uşaqlar üçün xüsusi hazırlanmış Gemini variantını təqdim etməyi planlaşdırır - bu versiyada ev tapşırıqlarında kömək, suallara cavab vermək və uşağın yaşına uyğun nağıllar yaratmaq kimi istifadə halları nəzərdə tutulur. Uşaqlar Gemini ilə Android, iOS tətbiqlərində və veb versiyada qarşılıqlı əlaqə qura biləcəklər.

Android cihazlarda isə bu xidməti əsas köməkçi kimi təyin etmək mümkün olacaq. Müasir süni zəka modellərinin qeyri-proqnozlaşdırıla biləcəyini nəzərə alaraq, Google istifadəçiləri xəbərdar edib ki, “Gemini səhvlərə yol verə bilər” və valideynlərə uşaqlara “Gemini-nin cavablarına tənqidi yanaşmağı öyrətməyi” tövsiyə edib. Şirkət vurğulayıb ki, uşaq başa düşməlidir: Gemini insan deyil, insan kimi cavab verə bilər, lakin şüura və emosiyalara malik deyil.

     

Buna görə də uşaq aldığı məlumatı yoxlamalı və süni zəkaya məxfi məlumatlarını etibar etməməlidir. Valideynlər həmçinin nəzərə almalıdırlar ki, süni zəkanın məzmun məhdudlaşdırma mexanizmləri mükəmməl deyil və Gemini potensial olaraq arzuolunmaz materiallar göstərə bilər. Bu səbəbdən sistemə nəzarət Family Link tətbiqi vasitəsilə həyata keçiriləcək. Google, uşaqlar üçün nəzərdə tutulmuş Gemini versiyasının istifadəyə verilmə tarixi barədə əlavə məlumat verəcəyini bildirib.