Microsoft rəsmi olaraq Windows 11 üçün yeni Start menyusu interfeysini təqdim edib. Bu interfeys daha çox fərdiləşdirilə bilən tərtibatı və Windows Phone Link funksiyası ilə dərin inteqrasiyası ilə seçilir. Yeni Start menyusunun imkanları haqqında ilk məlumatlar təxminən 1 ay əvvəl ortaya çıxmışdı. Sızıntılara əsasən, şirkət bütün tətbiqlər siyahısını əsas Start interfeysi ilə birləşdirən vahid bir tərtibat üzərində işləyirdi. İndi isə bu yeni Start menyusu rəsmi şəkildə Windows 11-də gözlənilən daha geniş funksional yeniliklərin bir hissəsi kimi təqdim olunub. Yeni menyuda bütün tətbiqlərin siyahısı pəncərənin ən altına keçirilib və 3 fərqli baxış rejimi təklif olunur.

Ənənəvi siyahı formasında, şəbəkə (grid) formasında və qruplaşdırılmış kateqoriyalar formasında. Start menyusunun sağ tərəfində, axtarış sətrinin yanındakı düyməyə bir dəfə klikləməklə Phone Link interfeysini göstərmək mümkündür. Bu interfeys batareyanın hazırkı səviyyəsini, bağlantı vəziyyətini, eləcə də son şəkilləri və mesajları əks etdirir. Yenilənmiş Start menyusu daha geniş fərdiləşdirmə imkanları əldə edib. İndi əsas görünüşdə sabitlənmiş tətbiqlərin siyahısı standart olaraq göstərilir.

 

     

“Recommended” bölməsini gizlətmək imkanı da əlavə olunub - bu halda sabitlənmiş tətbiqlər birbaşa bütün tətbiqlərin siyahısının üstündə görünəcək. “Start menyusu artıq daha fərdi olur - tətbiqlərinizi təşkil və fərdiləşdirmək üçün daha çox seçim təklif edir” - deyə Microsoft şirkətinin Windows Experiences üzrə məhsul direktoru Navjok Virk bildirib. “Bütün tətbiqlərin yeni kateqoriya görünüşü, ən çox istifadə etdiyiniz tətbiqlər və kateqoriyalar əsasında avtomatik şəkildə sıralanır. Beləliklə, sevimli tətbiqlərinizə tez çatmaq mümkün olur. Üstəlik, artıq bağlı Android və ya iOS cihazınız sadəcə bir klik məsafəsindədir”.