Google şirkəti Chrome brauzer istifadəçilərini onlayn dələduzluqdan qorumaq üçün süni zəka əsaslı yeni alətlər təqdim edib. Yenilik, istifadəçinin cihazında lokal şəkildə işləyən böyük dil modeli (LLM) olan Gemini Nano ilə bağlıdır. Məlumata əsasən bu texnologiya Chrome-un masaüstü versiyasında “Enhanced Protection” rejimində istifadə olunacaq və bu rejim standart mühafizəyə nisbətən iki dəfə yüksək təhlükəsizlik təmin edəcək. Gemini Nano potensial təhlükəli saytları, o cümlədən əvvəllər məlum olmayanları müəyyən etməyə və bloklamağa kömək edəcək. Google-un qeyd etdiyinə görə, bu texnologiya müxtəlif və mürəkkəb quruluşlu resursları analiz etmək qabiliyyəti sayəsində bu vəzifə üçün ideal seçimdir.

Şirkət həmçinin qeyd edir ki, yaxşı niyyətə sahib olmayan saytlar tərəfindən göndərilən bildirişlər risk yarada bilər - bu saytlarda push-bildirişlər istifadə olunaraq istifadəçiləri aldatmağa cəhd göstərilə bilər. Bunun qarşısını almaq üçün Chrome-un Android üçün mobil versiyasında belə push-bildirişlərə dair xəbərdarlıq sistemi təqdim olunacaq. İstifadəçi isə bu bildirişi söndürməyi və ya içindəki linkə keçid etməyi seçə biləcək. Google əlavə edib ki, axtarış sistemində dələduzluğa qarşı mübarizədə artıq süni zəkadan istifadə edir. Bu texnologiyalar hər gün 100 milyonlarla şübhəli nəticəni bloklamağa imkan verir. Xüsusilə, şirkət aviaşirkət əməkdaşı kimi təqdim olunan dələduzların sayında artım müşahidə etdiyini və yeni tədbirlər nəticəsində bu cür halların sayının 80%-dən çox azaldığını bildirib.