Mövcud olan mübahisəli bir nəzəriyyəyə görə, bütün canlı varlıqlar zəif işıq saçır. Kalqari Universitetindən olan alimlərin son araşdırması göstərib ki, siçanlar doğrudan da ölüm anına qədər fotonlar yayır və bu şüalanma həyat prosesləri dayandıqdan sonra dayanır. Bundan əlavə, alimlər müəyyən ediblər ki, bitkilər də işıq saçır və bu işığın intensivliyi zədələnmə halında artır. Tədqiqatçılar belə bir təcrübə aparıblar. 4 hərəkətsiz siçanı qaranlıqda, evtanaziyadan əvvəl və sonra görüntüləyiblər. Temperaturun nəticələrə təsirini istisna etmək üçün, heyvanlar öləndən sonra isti şəraitdə saxlanılıb. Xüsusi çəkiliş texnologiyası vasitəsilə alimlər görünən işıq diapazonunda ayrılıqda fotonları müşahidə edə biliblər.

Bu biofotonlar siçanlar öldükdən sonra ilk 1 saat ərzində tədricən yox olub. Fotonlar heyvanların bədənindən - daxili orqanlardan, baş və pəncələrdən yayılıb. Bu hadisə “çox zəif foton şüalanması” (UPE) adlanır. Ehtimal olunur ki, bu fenomen hüceyrə aktivliyi və ölüm sonrası tədricən sönən bioloji proseslərlə əlaqəlidir. Alimlərin sözlərinə görə, bu, açıq şəkildə göstərir ki, bu şüalanma həyatla bağlıdır. Daha sonra tədqiqatçılar həyatın başqa bir forması - bitkilərlə təcrübə aparıblar. Onlar vəzəri və cırtdan çətir palma bitkilərini zədələyib və üzərlərinə benzokain adlı ağrıkəsici kimyəvi maddə tətbiq ediblər. Təcrübə göstərib ki, bu parıltı ehtimal ki, aktiv oksigen formaları ilə əlaqədardır. Stress zamanı onların istehsalı kəskin artır.

     

Zədələnmiş yarpaq hissələri sağlam hissələrə nisbətən daha parlaq işıq saçıb. Kalqari alimləri hesab edirlər ki, bədənin işıq saçması sağalma prosesinin bir hissəsi ola bilər. Bu, tibbi diaqnostika sahəsində yeni perspektivlər açır. Gələcəkdə biofotonların səviyyəsinin - istər kifayət qədər olmaması, istərsə də həddindən artıq olması - təhlili həkimlərə toxuma zədələnmələrini, o cümlədən Altsheymer xəstəliyini daha dəqiq müəyyən etməyə kömək edə bilər. Araşdırmada iştirak etməyən bir bioloq isə bildirib ki, ölüm sonrası işığın itməsi “toxumalara oksigenin daxilolmasının dayanması” ilə bağlıdır. Əgər ölü beyinlə olan bir heyvanın bədənində və ya tək bir orqanda qan dövranı süni şəkildə saxlanılarsa, hüceyrələr biofoton istehsalını davam etdirə bilər.