"ChatGPT"nin inanmayacağımız funksiyaları gəlir: Rəhbər Sem Altman açıqladı
21.05.2025 / Maraqlı məlumatlar
"OpenAI"nin rəhbəri Sem Altman gələcəkdə "ChatGPT"ni insanın şəxsi həyat köməkçisi kimi görür - o, istifadəçinin bütün həyatını yadda saxlaya biləcək süni intellekt modeli yaratmaq niyyətindədir.
Bu barədə hightech.plus xəbər verib.
Altmanın idealına görə, bu, bir trilyon tokenlik kontekstə malik "balaca düşüncə modeli" olacaq. Model insanın danışıqlarını, oxuduğu kitabları, baxdığı səhifələri və digər şəxsi məlumatları analiz edə biləcək.
Altman qeyd edir ki, bu cür süni intellekt modeli insanın gündəlik həyatını davamlı olaraq yeniləyəcək və idarə edə biləcək. Məsələn, avtomobil texniki baxışına vaxt təyin etmək, toy səfərini planlamaq və hədiyyə sifariş etmək kimi işləri özü yerinə yetirəcək.
O bildirir ki, gənclər artıq "ChatGPT"dən həyat məsləhətçisi kimi istifadə edirlər.
"Yaşlılar "ChatGPT"dən sadəcə "Google" əvəzi kimi istifadə edirlər, 20-30 yaşlı insanlar isə onu həyat üzrə məsləhətçi kimi görürlər", - deyə Altman əlavə edib.
Bununla belə, ekspertlər xəbərdarlıq edirlər: süni intellekt modellərinə hələ tam güvənmək olmaz.
Məsələn, "ChatGPT" son zamanlar bəzi istifadəçilərin təhlükəli ideyalarını belə təsdiqləyib və zaman-zaman reallığa uyğun olmayan məlumatlar uydura bilir.
