"Chrome"dan parollarla bağlı çox gözlənən funksiya
22.05.2025 / Maraqlı məlumatlar
"Google" şirkəti "Chrome" brauzerinə istifadəçi məlumatlarının təhlükəsizliyini artırmaq məqsədilə yeni funksiya təqdim edib. Bu funksiya sayəsində brauzer zəif parolları avtomatik olaraq dəyişdirə biləcək.
Bu barədə şirkətin rəsmi saytında məlumat verilib.
Bildirilir ki, əgər "Chrome" riskli parol aşkar edərsə, istifadəçiyə onu dəyişdirməyi təklif edəcək. Dəstəklənən saytlarda isə brauzer özü güclü parol yarada və onu istifadəçinin hesabında yeniləyə biləcək.
Bu qərar funksiyanın ilin sonuna planlaşdırılan istifadəyə verilməsindən əvvəl tərtibatçıların sayt və tətbiqlərini uyğunlaşdırmaları üçün öncədən elan olunub.
"Chrome"un vitse-prezidenti və baş direktoru Parisa Tabriz bildirib ki, parol dəyişmək prosesi bir çox istifadəçi üçün çətin və narahatedici olduğuna görə bu, təhlükəsizlik səviyyəsini aşağı salır. Yeni avtomatik parol dəyişmə funksiyası həm təhlükəsizliyi, həm də xidmətlərlə qarşılıqlı əlaqəni daha rahat etməyi hədəfləyir.
Qeyd olunur ki, brauzer istifadəçinin razılığı olmadan heç bir hesab məlumatını avtomatik yeniləməyəcək. Bu isə parol dəyişdirmə prosesinə tam nəzarət imkanı yaradacaq.
