Meta AI-nın istifadəçi kütləsi 1 milyardı keçib
30.05.2025 / Maraqlı məlumatlar
Süni zəka əsaslı Meta AI köməkçisinin aylıq istifadəçi auditoriyası, inteqrasiya olunduğu bütün tətbiqlər üzrə, 1 milyard nəfərə çatıb. Bu barədə Meta Platforms şirkətinin rəhbəri Mark Zuckerberg səhmdarlarla illik görüş zamanı məlumat verib. Auditoriyanın artmasına ayrıca Meta AI tətbiqinin istifadəyə verilməsi də təsir edib. Zuckerberg bildirib ki, bu il şirkət əsas diqqətini Meta AI-nin təkmilləşdirilməsinə və onu fərdiləşdirmə, səsli qarşılıqlı əlaqə və əyləncə sahələrinə yönəlmiş qabaqcıl süni zəka köməkçisinə çevirməyə yönəldəcək. Onun fikrincə, şirkət Meta AI-nin inkişafını davam etdirməli, gəlir əldə etməyə başlamazdan əvvəl bu sahəni daha da gücləndirməlidir.
Alqoritmin inkişafı ilə paralel olaraq Meta-nın qarşısında iki imkan yaranacaq: Ya pullu tövsiyələrin tətbiqi, ya da istifadəçilərə daha çox hesablamaya əsaslanan imkanlar təqdim edən abunəlik xidmətləri təklif etmək. Fevral ayında kütləvi informasiya vasitələri Meta-nın öz süni zəka köməkçisi üçün ayrıca tətbiq buraxmaq və OpenAI-nin ChatGPT-si kimi rəqib məhsulların təklif etdiyi modelə bənzər pullu abunə xidmətini sınaqdan keçirmək niyyətində olduğunu yazmışdılar.
“Bəlkə də gülməli səslənə bilər, amma aylıq bir milyard istifadəçi bizə böyük miqyaslı görünmür - hazırda biz məhz bu mərhələdəyik” - deyə Zuckerberg səhmdarlara bildirib. Səhmdarların toplantısı zamanı investorlar şirkətin fəaliyyəti ilə bağlı 14 müxtəlif məsələ üzrə səs veriblər, bunlardan 9-u birbaşa səhmdarlar tərəfindən irəli sürülüb. Bu təkliflər arasında uşaq təhlükəsizliyinin təmin olunması, parnik qazlarının emissiyası və digər mövzular yer alıb. Bütün məsələlərlə bağlı səsvermənin nəticələri bir neçə gün ərzində Meta-nın rəsmi saytında və ABŞ Qiymətli Kağızlar və Birja Komissiyasının internet səhifəsində dərc olunacaq.
