"Microsoft" HDR ayarlarını ağıllandırdı: Görüntü keyfiyyəti yeni səviyyəyə keçir
02.06.2025 / Maraqlı məlumatlar
"Microsoft" şirkəti "Windows 11" əməliyyat sistemi üçün KB5058499 kodlu yeni yeniləməni yayımlayıb. Bu yeniləmə vasitəsilə istifadəçilərə HDR (High Dynamic Range) və "Dolby Vision" texnologiyalarını daha çevik və rahat şəkildə idarə etmək imkanı yaradılıb.
Bu barədə "The Verge" xəbər yayıb.
Bildirilir ki, artıq istifadəçilər sistemin ümumi HDR funksiyasını deaktiv edə, lakin HDR kontent (məsələn, "Netflix" və ya "YouTube") yayımlanarkən onun avtomatik aktiv olmasını təmin edə biləcəklər. Beləliklə, HDR yalnız ehtiyac olduqda işə düşəcək ki, bu da batareya və görüntü ayarlarının optimallaşdırılmasına kömək edəcək.
Bundan əlavə, "Dolby Vision" texnologiyası da yenilənib. Əvvəllər bu funksiyanı dəstəkləyən monitorlarda sistem avtomatik olaraq "Dolby Vision"u işə salırdı. Yeni yeniləmə ilə isə bu texnologiyanı əl ilə idarə etmək - istədikdə aktivləşdirmək və ya söndürmək mümkündür.
"Microsoft"un verdiyi məlumata əsasən, yeniləmə artıq bütün "Windows 11" istifadəçiləri üçün əlçatandır. Onu aktivləşdirmək üçün istifadəçilər "Windows Yeniləmələri Mərkəzi"ndə "Ən son yeniləmələri əldə et" seçimini aktiv etməlidirlər.
