İdarəetmə Sistemləri İnstitutunun əməkdaşı beynəlxalq konfransda iştirak edib
02.06.2025 / Maraqlı məlumatlar
AR Elm və Təhsil Nazirliyi İdarəetmə Sistemləri İnstitutunun (İSİ) Beynəlxalq əlaqələr və innovasiya şöbəsinin müdiri, t.ü.f.d. Tofiq Babayev 29-30 May 2025-ci il tarixlərində Pakistanın İslamabad şəhərində keçirilən CAREC İnstitutunun 5-ci illik tədqiqat konfransında (5th CAREC Institute Annual Research Conference) iştirak edib. Konfransın məqsədi bilik mübadiləsini və çoxtərəfli dialoqu inkişaf etdirməklə inteqrasiya olunmuş, innovativ və davamlı regional iqtisadiyyat üçün təsirli həllərin formalaşdırılması olub.
T.Babayev konfransın “Multimodal Logistics” seksiyasında Creation of National eLogistics Systems as the effective strategy for Digitalization of Multimodal Cargo Transportation in CAREC countries (“CAREC ölkələrində multimodal yük daşımalarının rəqəmsallaşdırılması üçün effektiv strategiya kimi milli elektron logistika sistemlərinin yaradılması”) mövzusunda təqdimatla çıxış edib.
Konfrans çərçivəsində CAREC institutunun direktoru Çarımuhammed Şalıyev, direktorun müavini Kuat Akiçanov və CAREC elm şöbəsinin müdiri Gulam Samed ilə görüşlər keçirilib. Görüş çərçivəsində CAREC ilə İSİ arasında rəqəmsal nəqliyyat dəhlizlərinin və milli elektron logistika sistemlərinin yaradılması istiqamətində əməkdaşlıq haqqında danışıqlar aparılıb, əməkdaşlıq müqaviləsinin bağlanması barədə razılıq əldə edilib. Həmçinin Pakistanın Sargodha Universitetinin icraçı rektoru professor Qaysar Abbas və rektor müavinləri ilə görüşdə İSİ ilə qarşılıqlı əməkdaşlıq imkanları müzakirə edilib, əməkdaşlıq haqqında niyyət protokolu hazırlanıb.
Sözügedən konfrans aparıcı ekspertlərin, siyasətçilərin və tədqiqatçıların CAREC (Central Asia Regional Economic Cooperation) regionunda əlaqə və ticarətin asanlaşdırılması strategiyalarını yenidən nəzərdən keçirəcək düşünülmüş dəlillərə əsaslanan tövsiyələr hazırlamaq üçün əməkdaşlıq platforması rolunu oynayıb. Konfransda regional əlaqə və ticarətin asanlaşdırılması, yaşıl nəqliyyat və dəhliz inkişafı, səmərəli və dayanıqlı nəqliyyat sistemlərinin inkişafı, gömrük islahatları və səmərəlilik, gömrük proseslərinin sadələşdirilməsi üçün innovativ yanaşmalar, enerji keçidi və yaşıl investisiya, özəl sektorun işi və regional əməkdaşlıq, multimodal logistika və digər istiqamətlər üzrə müzakirələr aparılıb.
