Yunanıstanda dünyada ilk dəfə insanabənzər robotların Olimpiadası keçiriləcək
03.06.2025 / Maraqlı məlumatlar
Avqustun 29-dan sentyabrın 2-dək Yunanıstanın Olimpiya şəhərində – qədim Olimpiya oyunlarının vətənində – dünyada ilk dəfə insanabənzər robotların beynəlxalq olimpiadası keçiriləcək.
Interesting Engineering xəbər verir ki, bu yarışda dünyanın müxtəlif ölkələrindən gəlmiş insanabənzər robotlar sprint qaçışı, uzağa tullanma və nizəatma kimi idman növlərində güclərini sınayacaqlar.
Tədbirin təşkilatçıları olan Acumino (süni intellekt sahəsində qabaqcıl texnologiyalar üzərində çalışan şirkət) və Endeavor Greece (innovativ startapları dəstəkləyən təşkilat) bu yarışın gələcəyin texnologiyaları ilə qədim ənənələrin sintezini nümayiş etdirəcəyini bildirirlər.
“Bu, qədim ənənələrlə futuristik texnologiyaların nadir birliyidir. Yaradıcılıq və robototexnika bir araya gələrək sabahın dünyasını formalaşdırır”, – deyə təşkilatçılar qeyd edir.
Olimpiada çərçivəsində iştirakçılar və qonaqlar üçün bir sıra elmi-texnoloji tədbirlər də nəzərdə tutulub:
Süni intellekt və robototexnika sahəsində aparıcı mütəxəssislərin çıxışları,
Robotlarla birbaşa ünsiyyət imkanı verən interaktiv ustad dərsləri,
Şagird və tələbələr üçün robotların proqramlaşdırılması və yığılması üzrə praktiki məşğələlər təşkil olunacaq.
Bu təlimlərdə iştirak üçün heç bir xüsusi texniki bilik tələb olunmur. Bu da tədbiri geniş auditoriya üçün açıq və əlçatan edir.
Xatırladaq ki, daha əvvəl Çində dünyada ilk dəfə insanabənzər robotlar arasında döyüşlər və robotlarla bərabər keçirilən yarımmarafon da təşkil olunmuşdu. Hər iki tədbir texnologiyanın idman sahəsinə inteqrasiyasını göstərən nümunə kimi qiymətləndirilir.
