“Elm” qəzetinin növbəti sayı işıq üzü görüb
20.06.2025 / Mühüm xəbərlər
AMEA-nın Rəyasət Heyətinin həftəlik mətbu orqanı olan “Elm” qəzetinin iyun ayında növbəti sayı çapdan çıxıb.
Bu sayın ön səhifəsində “Kahramanmaraşda “Azərbaycan” məhəlləsi qardaşlıq və həmrəyliyin rəmzidir” başlıqlı icmal və “Azərbaycan Milli Elmlər Akademiyasının strukturu”nda dəyişiklik edilməsi haqqında Azərbaycan Respublikası Nazirlər Kabinetinin qərarı təqdim edilib.
Bugünkü buraxılışın ilk səhifələrində Naxçıvan Bölməsində Azərbaycan Milli Elmlər Akademiyasının 80 illiyinə həsr olunmuş elmi sessiya, Naxçıvanda “Qərbi Azərbaycan: tarixi, mədəniyyəti və böyük qayıdış” mövzusunda respublika elmi konfransı, eləcə də AMEA-nın prezidenti akademik İsa Həbibbəylinin Naxçıvanda müxtəlif formatlarda görüşləri geniş şəkildə işıqlandırılıb.
Bundan əlavə, akademik İsa Həbibbəylinin Türk Dil Qurumunun rəhbəri professor Osman Mert, “UI GreenMetric” Dünya Universitetləri reytinqinin təsisçisi, İndoneziya Universitetinin professoru Riri Fitri Sari və belaruslu alimlərlə görüşləri haqqında informasiyalar bu nömrədə yer alıb.
Qəzetin bu sayında, Azərbaycan milli mətbuatının 150 illik yubileyi münasibətilə və “Azərbaycan dilçilik elminin mərkəzi” adlı məqalələr, eyni zamanda AMEA-nın elmi bölmə və müəssisələrində həftə ərzində keçirilən müxtəlif tədbirlərlə bağlı informativ yazılar və yeni nəşrlər təqdim edilib.
Qəzetin rus və ingilis dili bölmələrində akademik İsa Həbibbəylinin Naxçıvana səfəri çərçivəsində baş tutan görüşlər, tədbirlər barədə məlumatlar, həmçinin Azərbaycan polisinin qurucusu və islahatçısı, general-mayor, şərqşünas alim Məhəmməd Sadıq bəy Ağabəyzadənin dünya arxivlərində qorunan tarixi, elmi irsindən bəhs edən “Описание исторического и научного наследия Мухаммед Садыг бека Агабейзаде (Агабеева), хранящегося в архивах мира” başlıqlı məqalə dərc edilib.
