Yeni Chrome köhnə Android cihazlarda dəstəklənməyəcək
30.06.2025 / Maraqlı məlumatlar
Google Chrome 139-un buraxılışına hazırlaşdığını elan edib. Məlum olub ki, mobil brauzerin sistem tələbləri növbəti dəfə dəyişəcək. Lakin bu dəfə söhbət prosessor modelindən deyil, smartfona quraşdırılmış Android versiyasından gedir. Yeni versiya yalnız Android 10 və ondan yuxarı versiyalarla uyğun olacaq. Bu o deməkdir ki, Android 8 və 9 əməliyyat sistemləri ilə çalışan smartfonlar artıq brauzerin yeni versiyasını əldə edə bilməyəcəklər.
Bu cihazlarda Chrome 138 çalışmağa davam edəcək, lakin təhlükəsizlik yeniləmələri və müasir veb standartları ilə bağlı digər düzəlişlər daxil olmaqla, artıq heç bir yeniləmə olmayacaq. Google-un bəyanatında köhnə Android versiyalarının dəstəyinin niyə dayandırıldığı səbəbi açıqlanmayıb. Böyük ehtimalla bu, həmin versiyalardan istifadə edən istifadəçi sayının az olması və tətbiq üçün proqram təminatı dəstəyinin iqtisadi cəhətdən məqsədəuyğun olmaması ilə bağlıdır. 2025-ci ilin yazına olan statistikaya görə, dünyada cihazların 4%-ində Android 8/8.1, 5.8%-ində isə Android 9 quraşdırılmışdı.
