YouTube platformasında artıq Google axtarış sistemində istifadə olunan süni zəka-icmallara (AI Overviews) bənzər bir funksiyanın testinə başlanılıb. İndi müəyyən sorğular zamanı istifadəçilərə sadəcə video siyahısı deyil, əsas video, digər videoların mini görüntüləri və süni zəka tərəfindən yaradılmış mətn formasında daha geniş cavab təqdim olunacaq. Blokda yer alan əsas videoya klikləməklə tam versiyaya baxmaq mümkün olacaq. Əgər axtarış mövzusu alış-veriş, səyahət və ya yerli görməli yerlərlə bağlıdırsa, ABŞ-da olan bəzi YouTubePremium istifadəçiləri nəticələri süni zəka-karusel şəklində görəcəklər. Bu barədə məlumat şirkətin rəsmi bloqunda paylaşılıb.

 

 

Funksiya hələlik yalnız iOS və Android üçün mobil YouTube vasitəsilə əlçatandır, yalnız ingilis dilində olan videolarla işləyir və 30 iyula qədər test mərhələsində olacaq. YouTube-un daxili dəstək sənədinə əsasən, bu sınaqda yalnız ABŞ-dakı Premium hesab abunəçiləri arasından təsadüfi seçilmiş istifadəçilər iştirak edə biləcəklər. The Verge qeyd edir ki, bu məhdudiyyət yeni texnologiyanın test mərhələsində olması ilə əlaqədardır. Bundan əlavə, xidmət videonun məzmunu barədə sual verməyə imkan verən dialoq əsaslı süni zəka alətinin əlçatanlığını genişləndirib. Bu funksiya əvvəllər yalnız Premium istifadəçilər üçün aktiv idi, lakin indi ABŞ-da bəzi adi istifadəçilər üçün də əlçatan olub. Qeyd edək ki, bu alət ilk dəfə 2023-cü ildə təqdim olunmuşdu, lakin onun geniş tətbiqinə yalnız indi başlanılıb.