Köçürülmə məqsədilə qismən akademik tanınma şəhadətnaməsi əldə etmək istəyən vətəndaşların nəzərinə
01.07.2025 / Maraqlı məlumatlar
Xarici ölkələrdə əldə olunmuş ali təhsil kvalifikasiyalarının tanınması prosesi Azərbaycan Respublikası Prezidentinin 2023-cü il 18 avqust tarixli Fərmanı ilə təsdiqlənmiş “Xarici dövlətlərin ali təhsilə aid kvalifikasiyalarının tanınması Qaydaları”na əsasən həyata keçirilir. Qaydaların 5.9-cu bəndinə uyğun olaraq, xaricdə natamam ali təhsil alan şəxslər təhsillərini Azərbaycan Respublikasının ali təhsil müəssisələrində davam etdirmək istədikləri halda, əvvəlcə Təhsildə Keyfiyyət Təminatı Agentliyinə müraciət edərək kvalifikasiyalarının qismən tanınması üçün şəhadətnamə əldə etməlidirlər. Bu sənəd onlara yalnız ölkə daxilindəki ali təhsil müəssisələrinə köçürülmə üçün müraciət hüququ verir.
Təhsildə Keyfiyyət Təminatı Agentliyindən (TKTA) AZƏRTAC-a bildirilib ki, köçürülmə prosesi “Ali təhsil müəssisələrinin bakalavriat və magistratura səviyyələrində təhsilalanlar tərəfindən təhsil müəssisəsinin, ixtisasın, təhsilalma formasının dəyişdirilməsi...” ilə bağlı qaydalara əsasən həyata keçiriləcək.
Vətəndaşların müraciətlərini nəzərə alaraq, TKTA qismən akademik tanınma prosesi iyulun 7-si saat 18:00-dək uzadılıb. Müraciətlər yalnız elektron formada vasitəsilə qəbul olunur.
Əlavə olaraq, TKTA yalnız qismən akademik tanınma prosesini həyata keçirir və təqdim olunan şəhadətnamə Elm və Ali Təhsil üzrə Dövlət Agentliyi tərəfindən aparılan köçürülmə prosesində tələb olunan sənədlərdən biridir.
Müraciət zamanı aşağıdakı məqamlara ciddi diqqət yetirilməsi tövsiyə olunur:
- Akademik transkript apostil möhürü ilə leqallaşdırılmış olmalıdır;
- Transkript üzərində ali təhsil müəssisəsinə qəbul tarixi aydın şəkildə göstərilməlidir;
- Təhsil müddətində əldə edilmiş AKTTS kreditlərinin ümumi miqdarı qeyd olunmalıdır;
- Transkript bütün ali təhsil müddətini əhatə edən yekun sənəd olmalıdır;
- Transkript ingilis, rus və türk dillərindən fərqli dildədirsə, Azərbaycan dilinə tərcümə olunmalı və notarial qaydada təsdiq edilməlidir.
Sənədlərin autentikliyinin (həqiqi) mümkün olan ən qısa zamanda yoxlanılmasını həyata keçirmək məqsədilə sözügedən sənədlərin QR kod və ya elektron imzalı (keçid (link) əlavə olunmuş şəkildə) edilməsi arzuolunandır.
