“Netflix” NASA raketlərinin buraxılışını və açıq kosmosa çıxışları canlı yayımlayacaq
02.07.2025 / Maraqlı məlumatlar
Bu yay “Netflix” NASA tərəfindən canlı yayımlanan məzmunu, o cümlədən raket buraxılışları, kosmosda gəzintilər və kosmik fəzadan Yerin mənzərəsini yayımlayacaq.
NASA açıqlamasında bildirib ki, bu addım qlobal auditoriyaya çatmaq səylərinin bir hissəsidir. Agentlik qeyd edib ki, məzmun artıq canlı yayımların mövcud olduğu NASA proqramında və internet saytında pulsuz və reklamsız qalacaq.
“NASA+” yayım xidməti 2023-cü ildə ictimaiyyətə kosmik məzmuna daha asan giriş imkanı vermək üçün istifadəyə verilib. “1958-ci ildə təsdiq edilən Milli Aeronavtika və Kosmos Qanunu bizi kosmosun tədqiqi hekayəsini mümkün qədər geniş auditoriya ilə paylaşmağa çağırır”, -deyə Xidmətin direktoru Rebekka Sirmons bildirib.
NASA sövdələşmənin maliyyə detallarını açıqlamır. Tərəfdaşlıq İlon Maskın “SpaceX” şirkətinin rəhbərlik etdiyi kommersiya raket buraxılışlarının artması fonunda baş verir. “Space Explored”in məlumatına görə, 2025-ci ilin birinci yarısında “SpaceX” tərəfindən kosmosa 81 raket və peyklər göndərilib. O, həmçinin Beynəlxalq Kosmik Stansiyaya astronavtları daşımaq üçün sertifikatlı kosmik gəmisi olan yeganə ABŞ şirkəti olaraq qalır.
Canlı yayımlar 2025-ci ilin yayında başlayacaq. Bu xidmətin abunəçiləri Beynəlxalq Kosmik Stansiyadan birbaşa reportajlardan və orbitdən - Yer kürəsinin mənzərəsindən həzz ala biləcəklər.
