ChatGPT platformasından xəbər saytlarına keçidlərin sayı artıb. Bu barədə məlumat Similarweb-in statistikalarında qeyd edilib. Lakin bu artım axtarış sistemindən edilən kliklərin azalmasını kompensasiya etmək üçün yetərli deyil. İstifadəçilər getdikcə daha çox süni zəka əsaslı axtarış nəticələrindəki xəbər materialları ilə kifayətlənirlər. 2023-cü ilin may ayında Google axtarış sistemində süni zəka ilə yaradılmış icmallar tətbiq olunmağa başladıqdan sonra, veb versiyada xəbər saytlarına yönəlməyən axtarış sorğularının sayı 56%-dən 2025-ci ilin may ayına qədər 69%-ə yüksəlib. Orqanik trafik də azalıb: 2024-cü ilin ortalarında bu rəqəm 2.3 milyard keçid idisə, indi 1.7 milyarddan aşağı düşüb. Eyni zamanda, 2024-cü ilin yanvarından 2025-ci ilin mayına qədər ChatGPT-də xəbər axtarışlarının sayı 212% artıb.

Beləliklə, xəbər resursları üçün süni zəkanın sürətli yayılması oyun qaydalarını dəyişir. Axtarış nəticələrində ön plana çıxma və keyfiyyətli axtarış optimizasiyası əvvəlki qədər əhəmiyyət daşımır. Saytın axtarış nəticələrindəki mövqeyi artıq əvvəlki kimi böyük trafik gətirmir. Halbuki ChatGPT-dən xəbər saytlarına keçidlərin sayı artır: 2024-cü ilin yanvarından may ayına qədər bu göstərici təxminən 1 milyon olubsa, 2025-ci ildə artıq 25 milyona çatıb - yəni 25 dəfə çox. Lakin orqanik axtarış trafikindəki kəskin azalma şəraitində bu artım itkiləri kompensasiya etmək üçün kifayət etmir. Ən yüksək artım Reuters-də qeydə alınıb (illik artım 8.9%), ardından New York Post (+7.1%) və Business Insider (+6.5%) gəlir. OpenAI-yə qarşı məhkəmə iddiası qaldırmış New York Times isə 3.1% artım göstərib.

Son yarım il ərzində ChatGPT-nin özü də auditoriyasını artırıb. Tətbiqin istifadəçi sayı 2 dəfədən çox artıb, veb saytın ziyarətçilərinin sayı isə 52% yüksəlib. Similarweb brendlərə və bizneslərə generativ süni zəka xidmətlərində bu və ya digər markanın ön plana çıxmasını izləməyə və nəticələri rəqiblərlə müqayisə etməyə imkan verən bir xidmət təklif etməyə başlayıb. Axtarış trafikinin azalması fonunda Google nəşriyyatlara Offerwall adlı bir xidmət təqdim edib. Bu, mikroməbləğli ödənişlər və pullu abunəliklər kimi reklama alternativ monetizasiya üsullarını sınaqdan keçirməyə yönəlib. Lakin bu yanaşma hamıya kömək etmir - bəzi xəbər resursları ixtisarlara gedir və hətta fəaliyyətlərini dayandırırlar.