"Chrome" dövrünün sonu? - "OpenAI" yeni nəsil intellektual brauzeri təqdim edir
11.07.2025 / Maraqlı məlumatlar
"ChatGPT" süni intellekt sisteminin yaradıcısı olan "OpenAI" şirkəti yaxın vaxtlarda süni intellekt texnologiyalarına əsaslanan öz brauzerini təqdim edəcək.
Bu barədə "Reuters" agentliyi məsələ ilə tanış mənbələrə istinadla məlumat yayıb.
Bildirilib ki, "OpenAI"nin yeni brauzeri geniş süni intellekt funksiyaları ilə təchiz ediləcək. Bu, istifadəçilərə informasiya axtarışını avtomatlaşdırmağa imkan verəcək.
Əgər məhsul uğurla istifadəyə verilərsə, "OpenAI"nin brauzeri hazırda qlobal bazarın üçdəikisindən çoxuna sahib olan "Google Chrome"un mövqelərini zəiflədə bilər və şirkət üçün əhəmiyyətli reklam gəlirləri təmin edə bilər.
Qeyd edək ki, 2025-ci ilin aprelində "OpenAI" "Google Chrome"un alınmasında maraqlı olduğunu bəyan etmişdi, lakin bu saziş baş tutmamışdı.
