Süni intellektə əsaslanan çat-bot olan ChatGPT məşhurluğunu sürətlə artırmağa davam edir. OpenAI-nin məlumatına görə, istifadəçilər çat-bota gündəlik 2.5 milyarddan çox sorğu göndərirlər. Bu, illik hesablamada təxminən 912.5 milyard sorğu deməkdir. Axios-un xəbərinə görə, bu sorğuların 330 milyonu hər gün ABŞ-dan olan istifadəçilər tərəfindən göndərilir. ChatGPT hələlik ildə təxminən 5 trilyon sorğu işləyən Google axtarış sistemi ilə müqayisədə geridə qalsa da, onun sürətli artımı axtarış nəhəngi üçün ciddi təhlükə yaradır. Cəmi bir neçə ay ərzində, 2024-cü ilin dekabrında həftəlik 300 milyon istifadəçisi olan çat-botun auditoriyası 2025-ci ilin martına qədər 500 milyonu keçib. Bu ayın əvvəlində Reuters agentliyi mənbələrə istinadən xəbər verib ki, OpenAI yaxın həftələrdə süni intellekt əsaslı öz veb-brauzerini istifadəyə verməyə hazırlaşır - ekspertlər bu addımı Google Chrome-a birbaşa rəqabət çağırışı kimi qiymətləndirirlər. Şirkət bu buraxılışa hazırlaşmaq üçün ötən həftə istifadəçi adından tapşırıqları yerinə yetirə bilən ChatGPT Agent alətini təqdim etdi.