Britaniya hökuməti süni intellekti dövlət xidmətlərində tətbiq edəcək
22.07.2025 / Maraqlı məlumatlar
“ChatGPT” süni intellekt platformasının yaradıcısı olan “OpenAI” şirkəti ilə Böyük Britaniya hökuməti arasında dövlət xidmətlərində məhsuldarlığın artırılması məqsədilə süni intellektdən istifadəyə dair razılaşma imzalanıb.
Elm və texnologiya departamenti ilə imzalanan anlaşma memorandumu “OpenAI” şirkətinə dövlət məlumatlarına çıxış imkanı verə və onun proqram təminatının təhsil, müdafiə, təhlükəsizlik və ədliyyə sahələrində istifadəsini nəzərdə tuta bilər.
Texnologiya üzrə dövlət katibi Piter Kayl bildirib ki, süni intellekt Birləşmiş Krallıqda dəyişikliklərin aparılmasında və iqtisadi artımın təmin olunmasında əsas rol oynayacaq.
Anlaşma memorandumunda qeyd olunur ki, Böyük Britaniya və “OpenAI” süni intellektin imkanları və təhlükəsizlik risklərini daha yaxşı başa düşmək və bu risklərin azaldılması üçün birgə işləmək niyyətindədir. Sənəddə, həmçinin məlumat mübadiləsi proqramının hazırlanması və ictimaiyyətin müdafiəsi ilə demokratik dəyərlərin qorunması üçün təminat mexanizmlərinin inkişaf etdirilməsi nəzərdə tutulur.
“OpenAI”nin baş direktoru Sem Altman bildirib ki, bu təşəbbüs hamı üçün rifah gətirəcək.
