Google Chrome-da mağazaların süni intellekt icmalları istifadəyə veriləcək
30.07.2025 / Maraqlı məlumatlar
Google Chrome brauzerində süni intellektdən istifadə edərək internet mağazaları haqqında qısa icmallar yaradan yeni funksiyanı təqdim edib. Ünvan sətrinin solundakı ikona kliklədikdə, mağazanın nüfuzu ilə bağlı məlumatların əks olunduğu pəncərə görünəcək. Bu məlumatlara məhsul keyfiyyəti, qiymətlər, müştəri xidməti, qaytarma şərtləri və alış-veriş təcrübəsi kimi göstəricilər daxil olacaq. Məlumata görə, bu icmallar növbəti platformalardakı rəylər əsasında formalaşdırılacaq: Bazaarvoice, Bizrate Insights, Reputation.com, Reseller Ratings, ScamAdviser, Trustpilot, TurnTo, Yotpo və Verified Reviews. Funksiya ilkin mərhələdə yalnız ABŞ-dakı istifadəçilər üçün masaüstü kompüterlərdə və yalnız ingilis dilində əlçatan olacaq.
Google mobil versiyada bu funksiyanın olub-olmayacağı barədə açıqlama verməyib. Şirkətin bəyanatına görə, bu funksiya onlayn alış-verişi daha təhlükəsiz və rahat etmək məqsədi daşıyır. Lakin funksiyanın təqdimatı, həmçinin, geyim ölçüsünə uyğun seçim, rəylərin analizi və fərdi tövsiyələr üçün süni intellektdən aktiv istifadə edən Amazon ilə güclənən rəqabət kontekstində baş verir. Qeyd olunur ki, bu yenilik Chrome brauzerinə Perplexity Comet, The Browser Company (Dia) və Opera Neon kimi rəqib süni intellekt brauzerlərin artan təzyiqi fonunda ortaya çıxıb. Bu vəziyyət Google-u öz brauzerinə süni intellekti daha fəal şəkildə inteqrasiya etməyə vadar edir.
Hazırda Google-un üzərində işlədiyi layihələr arasında istifadəçi adından Chrome-da fəaliyyət göstərə bilən süni intellekt agenti və abunəçilər üçün Gemini köməkçisinin dəstəyi yer alır. Şirkət daha əvvəl məhsul axtarışı, fərdi tövsiyələr, virtual geyim sınağı, qiymətlərin izlənməsi, AI Mode rejimində alış-veriş və avtomatlaşdırılmış sifariş rəsmiləşdirməsi kimi süni intellekt funksiyalarını təqdim etmişdi. Sonuncu iki funksiya bu il keçirilmiş Google I/O konfransında təqdim olunub. Geyim və interyer tərzlərinin süni intellektlə seçilməsi funksiyası isə bu payız istifadəyə veriləcək.
