Çin alimləri 600 Vt·saat/kq enerji sıxlığına maliklitium-metal batareyanın yaradıldığını elan ediblər - bu, Tesla-nın ən yaxşı batareyalarının səviyyəsindən 2 dəfə, BYD-nin kütləvi istehsal etdiyi həllərdən isə təxminən 4 dəfə çoxdur. Üstəlik, batareya yanmır, -60 dərəcə Selsi temperaturda sabit işləyir və mismarla deşilməyə asanlıqla tab gətirir. Bu irəliləyiş elektromobillərin yürüş məsafəsini radikal şəkildə artırmaqla yanaşı, elektrik təyyarələri və dronları da yeni səviyyəyə qaldıra bilər. Belə ki, yeni batareya prototipi ilə dronların ilk sınaq uçuşları uçuş müddətini 2.8 dəfə artırıb. Tədqiqatçılar bildiriblər ki, onlar litium-metal batareyalarının əsas məhdudiyyətini - qeyri-sabit və təhlükəli elektroliti aradan qaldıra biliblər. Çin komandası solvasiya strukturunu dəyişdirərək onu daha seyrək hala gətirib. Duz və həlledici kombinasiyalarının optimal variantlarını tapmaq üçün alimlər machine learning üsullarından istifadə ediblər.

Nəticədə flüor əlavə edilən bir tərkib kəşf olunub ki, bu da elektrolitə yüksək termal davamlılıq qazandırıb. Müəlliflərin məlumatına görə, hazırlanmış prototip açıq alovun təsirinə, -60 dərəcə Selsiyə qədər ekstremal soyuğa və mismarlarla deşilməyə tab gətirib. Bu sınaqlar adətən batareyaların alışmasına və ya sıradan çıxmasına səbəb olur. Təcrübələr təsdiqləyib ki, yeni batareya yalnız rekord enerji sıxlığı təmin etmir, həm də istismarının ilkin mərhələlərində sabitlik nümayiş etdirir. Sınaqlar zamanı batareya 90 şarj dövrünə tab gətirib və bu müddətdə göstəricilərdə kritik azalma müşahidə olunmayıb. Bu, hələ ki, müasir litium-ion batareyalarının minlərlə dövrünə nisbətdə xeyli geridə qalır, lakin artıq inkişaf istiqamətini göstərir.

Yeni batareya ilə aparılmış ilk testlərdə dronların uçuş müddəti 2.8 dəfə artırılıb. Demo ssenarilərində isə batareya heç bir deqradasiya əlaməti olmadan 25 tam şarj dövrünə dözə bilib. Tərtibatçılar qeyd edirlər ki, texnologiya hələ prototip mərhələsindədir və seriyalı istehsala çatmaq üçün bir neçə il vaxt tələb olunacaq. Bununla belə, ekspertlər onu elektrikli avtomobillərin əsas məhdudiyyətlərindən biri olan - adətən “yol məsafəsi ilə bağlı narahatlıq” adlandırılan problemi aradan qaldıra biləcək dönüş nöqtəsi hesab edirlər. “Təhlükəsizliyi yüksək səviyyədə saxlayaraq belə batareyaları miqyaslandıra bilsək, bu, aviasiyada reaktiv mühərrikin meydana çıxması ilə müqayisə oluna biləcək bir inqilab olacaq” - deyə tədqiqatın müəllifləri vurğulayıblar.

     
Bu irəliləyiş həm də strateji əhəmiyyət daşıyır: o, Çini dövlət proqramı olan “Made in China 2025” məqsədlərinə yaxınlaşdırır, burada batareyaların səmərəliliyinin artırılması əsas prioritetlərdən biridir. Tesla, BYD və Çin startapları arasında kəskin rəqabət fonunda məhz bu tip texnologiyalar qlobal bazarda liderliyi müəyyən edə bilər. Hazırda əsas çətinlik batareyanın uzunömürlülüyü olaraq qalır, lakin 600 Vt·saat/kq həddini ən yüksək təhlükəsizlik göstəriciləri ilə aşmaq artıq elektrik nəqliyyatında yeni bir dövrün yaxınlaşdığını göstərir.