Meta rəsmi şəkildə süni intellekt bölməsinin yenidən təşkil olunduğunu təsdiqləyib, mövcud strukturu ləğv edərək OpenAI, Anthropic və GoogleDeepMind kimi rəqiblərdən geri qalmanı aradan qaldırmaq üçün 4 yeni ixtisaslaşmış qrup yaradıb. Dəyişikliklər barədə məlumat daxili xidməti qeyddən bəlli olub və iyunda Meta-ya süni intellekt bölməsinin direktoru kimi qoşulan Scale AI qurucusu AlexandrWang tərəfindən elan edilib. Yeni struktur Meta Superintelligence Labs (MSL) adını alıb. Məlumata görə, onun mərkəzi elementi şəxsən Wang tərəfindən idarə olunacaq TBD Labs adlı qrup olacaq.

Bu komandanın əsas diqqəti Llama seriyası da daxil olmaqla standart süni intellekt modellərinin hazırlanmasına yönələcək. Onun son versiyası isə aprel ayında buraxılmışdı. Qalan 3 bölmə isə fundamental tədqiqatlarla, süni intellektin məhsullara inteqrasiyası ilə və infrastrukturun inkişafı ilə məşğul olacaq. Məlumata görə, Meta şirkətinin baş direktoru Mark Zuckerberg yeni bölmənin kadr seçiminə şəxsən qatılıb, bu isə istiqamətin şirkət üçün strateji əhəmiyyət daşıdığını göstərir. Ötən həftə Meta şirkətinin son 6 ay ərzində dördüncü dəfə süni intellektin hazırlanması ilə məşğul olan bölmələrinin strukturunu dəyişməyi planlaşdırdığı bildirilmişdi.