OpenAI şirkəti ChatGPT-nin pulsuz istifadəçilərinə əvvəl yalnız ödənişli abunəçilərə təqdim olunmuş Projects funksiyasına giriş imkanı verdi. Projects söhbətləri mövzular üzrə bölməyə, sorğuları tənzimləməyə, məlumatlara girişə məhdudiyyət qoymağa, vizual tərtibat seçməyə və s. imkan verir. Projects funksiyası artıq Android tətbiqində və brauzerin veb versiyasında əlçatandır. iOS tətbiqi isə yaxın günlərdə yenilənəcək. Bu barədə OpenAI şirkətinin X-dəki rəsmi hesabında bildirilib. Projects əslində layihə-qovluq sistemidir, burada ChatGPT ilə söhbətləri mövzuya görə bölmək mümkündür.

Hər bir layihənin istifadəçi tərəfindən seçilə bilən öz rəngi və ikonuna, həmçinin fərdi ayarlarına və süni intellektin istifadə edə biləcəyi məlumatlara qoyulan məhdudiyyətlərinə sahib ola bilər. Bu imkanlar xüsusilə neyron şəbəkələrlə mütəmadi və mürəkkəb tapşırıqlarda işləyənlər üçün faydalıdır. Bundan əlavə, Projects-də fayl yükləmə limiti artırılıb. Pulsuz tarifdə 5, Plus-da 25, Pro-da isə 40 fayl əlavə etmək mümkündür. Əvvəllər Projects yalnız ödənişli abunəçilərə açıq idi, lakin OpenAI imkanları tədricən daha geniş istifadəçi kütləsi üçün əlçatan etməyə qərar verib. Daha əvvəl Deep Research və ChatGPT Voice funksiyaları da eyni qaydada ödənişli kateqoriyadan pulsuz kateqoriyaya keçirilmişdi. Şirkətdə hesab edirlər ki, belə addımlar pulsuz istifadəçilərin ödənişli tariflərə keçidini stimullaşdıracaq.