Datacenter Dynamics-in məlumatına görə, Microsoft şirkəti nüvə energetikasının inkişafı ilə məşğul olan beynəlxalq qeyri-kommersiya təşkilatı - Londonda yerləşən Ümumdünya Nüvə Assosiasiyasına (WNA) qoşulub. WNA 2001-ci ildə təsis edilib. Onun əsas fəaliyyət istiqamətləri qabaqcıl nüvə texnologiyalarını, məsələn, kiçik modul reaktorlarını dəstəkləmək, lisenziyalaşdırma proseslərinin sadələşdirilməsinə kömək etmək və atom energetikası sahəsində qlobal təchizat zəncirlərini gücləndirməkdir. WNA saytında qeyd olunur ki, hazırda assosiasiyaya dünyanın 44 ölkəsində yerləşən şirkətlər və təşkilatlar daxildir. Bunlara atom maşınqayırması, tikinti və tullantıların idarə olunması sahəsində böyük müəssisələr, həmçinin elmi-tədqiqat və təcrübi-konstruktor müəssisələri daxildir.

WNA iştirakçıları arasında Accenture, CEZ, Constellation Energy, EDF, GE Vernova, Iberdrola, Oklo, PG&E və bir çox digər şirkətlər yer alır. “Microsoft-un assosiasiyaya üzvlüyü sənaye üçün dönüş nöqtəsidir. Şirkətin iştirakı nüvə energetikasının həm iqlim məqsədlərinə nail olmaq, həm də data-mərkəzlərdən gələn artan enerji tələbatını ödəmək üçün zəruri miqyasda tətbiqini sürətləndirəcək” - deyə WNA-nın baş direktoru Sama Bilbao y Leon bildirib. Məlumata görə, Microsoft-un enerji texnologiyaları bölməsi nüvə energetikasının tətbiqini sürətləndirmək, tənzimləmə proseslərini optimallaşdırmaq və yeni kommersiya modelləri hazırlamaq məqsədilə WNA-nın texniki işçi qrupları ilə birbaşa əməkdaşlıq edəcək.

Yekun məqsəd nüvə energetikasını rəqəmsal iqtisadiyyatın, o cümlədən data-mərkəzlər seqmentinin artan tələblərini ödəyəcək miqyasda genişləndirməkdir. Microsoft nüvə energetikası sahəsində bir sıra layihələr inkişaf etdirir. Əvvəllər bildirilmişdi ki, şirkət data-mərkəzlərin enerji təminatı üçün kiçik atom reaktorları üzərində işləyəcək komanda formalaşdırır. Bundan əlavə, Microsoft ABŞ-ın ən böyük AES operatoru olan Constellation Energy ilə Pensilvaniyadakı Three Mile Island sahəsində istehsal olunacaq elektrik enerjisinin tədarükü üçün 20 illik müqavilə imzalayıb. Bununla yanaşı, Microsoft ümid edir ki, süni intellekt böyük data-mərkəzləri enerji ilə təmin edə biləcək iqtisadi cəhətdən səmərəli kommersiya termonüvə reaktorlarının hazırlanmasını sürətləndirəcək.