OpenAI süni intellekt vasitəsilə animasiya filminin istehsalında yardımçı olur
11.09.2025 / Maraqlı məlumatlar
OpenAI tammetrajlı “Critterz” adlı animasiya filminin yaradılmasına kömək edir. Cizgi filmi generativ süni intellektdən, o cümlədən GPT-5-dən istifadə olunaraq hazırlanır: rəssamlar personajların eskizlərini çəkir, aktyorlar onları səsləndirir, neyron şəbəkələr isə səhnələri animasiya, materialları isə emal edirlər. Filmin premyerası 2026-cı ildə Kann kinofestivalında planlaşdırılır, layihənin büdcəsi isə cəmi 9 aylıq istehsal qrafiki ilə 30 milyon dollardan azdır. Filmin məqsədi Hollywood-a göstərməkdir ki, süni intellekt keyfiyyətli animasiyanı daha sürətli və daha ucuz yaratmağa imkan verir. “Critterz” adlı tammetrajlı animasiya filminin süjeti meşə məxluqlarından bəhs edir. Onlar kəndlərinə yad birisinin hücumundan sonra səyahətə çıxırlar.
Personajlar 3 il əvvəl OpenAI-in kreativ mütəxəssisi Chad Nelson tərəfindən DALL-E şəkil generasiya alətindən istifadə edilərək çəkilmiş qısametrajlı film üçün hazırlanmışdı. İndi isə bu qəhrəmanlar tammetrajlı layihənin bir hissəsinə çevriləcəklər. Filmin yaradılması Los-Ancelesdən Native Foreign və Londondan Vertigo Films şirkətləri ilə birgə həyata keçirilir. İstehsal qrafiki cəmi 9 ay təşkil edir, büdcə isə 30 milyon dollardan azdır ki, bu da tammetrajlı animasiyanın standart xərclərindən xeyli aşağıdır. Müqayisə üçün, ənənəvi cizgi filmləri adətən 3 il ərzində və daha böyük büdcələrlə hazırlanır. Məsələn, 2015-ci ildə Pixar studiyası tərəfindən buraxılmış “Inside Out” 175 milyon dollara başa gəlib.
“Critterz” animasiya filmi üzərində cəmi 30 nəfərlik komanda çalışacaq. Peşəkar rəssamlar personajların eskizlərini çəkəcək, sonra isə onları OpenAI çat-botuna yükləyəcəklər. Canlı aktyorlar qəhrəmanları səsləndirəcəklər. Neyron şəbəkələr isə bu materialları emal edərək istehsal prosesini sürətləndirəcək və xərcləri azaldacaqlar. Ssenari üzərində “Paddington in Peru” filminin müəllifləri də daxil olmaqla təcrübəli mütəxəssislər işləyiblər. Şirkət kino xadimlərini inandırmaq istəyir ki, süni intellekt filmlərin yaradılması üçün bir alətə çevrilə bilər, xüsusən də məhdud resurslara malik komandalar üçün. Əgər “Critterz” uğurlu olarsa, bu, kino sənayesində süni intellektin daha geniş istifadəsinə yol açacaq.
