YouTube videoların müxtəlif dillərə dublyaj funksiyasını bütün müəlliflər üçün istifadəyə verib
12.09.2025 / Maraqlı məlumatlar
YouTube platforması videoların müxtəlif dillərə dublyaj funksiyasının rəsmi istifadəyə verildiyini elan edib. Bu funksiyanın sayəsində YouTube-da kontent yerləşdirən milyonlarla müəllif dünyanın daha geniş auditoriyasına çata biləcək. Müxtəlif dillərə dublyaj funksiyasının sınaqdan keçirilməsi üzrə pilot layihə YouTube komandası tərəfindən 2023-cü ildə işə salınmışdı. Layihədə amerikalı yutuberlər MrBeast, Mark Rober və aşpaz Jamie Oliver də daxil olmaqla məhdud sayda kontent yaradıcısı iştirak edib. Süni intellekt əsasında işləyən avtomatik dublyaj funksiyası müəllifin intonasiyasını və emosiyalarını ötürmək üçün Google-un Gemini modelindən istifadə edir.
YouTube-un məlumatına görə, birdən çox dildə audioyazılar yükləyən müəlliflərin videolarında baxış müddətinin orta hesabla 25%-dən çoxu əsas dildən başqa dillərdəki versiyalara düşüb. Xüsusilə aşpaz Jamie Oliver-in kanalında çoxdilli audioyazıların istifadəsi baxış sayını 3 dəfə artırmağa imkan verib. Mark Rober isə videolarında ən çox çoxdilli audioyazı yükləyənlərdən biridir - orta hesabla bir videoda 30-dan çox dil. Buna görə də onun yeni buraxılışlarını Seuldan tutmuş San-Pauluya qədər bütün izləyici icması izləyə bilir. YouTube komandası həmçinin məhdud sayda kontent müəlliflərinin iştirakı ilə çoxdilli miniatürlərin istifadəsini də sınaqdan keçirir. İyundan etibarən onlar beynəlxalq auditoriyanı nəzərə alaraq miniatürlərdəki mətnlərin digər dillərdə göstərilməsini tənzimləmək imkanı əldə ediblər. Dublyajdan keçmiş miniatürlər isə istifadəçilərin yerləşdikləri regionlarda üstünlük verdikləri dildə mətnləri əks etdirir.
