Qualcomm yaxın zamanda flaqman mobil prosessoru Snapdragon 8 Elite Gen 5-i təqdim edəcəyini elan edib. Prosessor 23 sentyabr tarixində Snapdragon Summit 2025 tədbirində təqdim ediləcək. Bu prosessordan istifadə edəcək ilk smartfon istehsalçılarından biri Xiaomi olacaq. Çin istehsalçısı artıq təsdiqləyib ki, onun flaqman Xiaomi17 seriyası - Xiaomi 17, 17 Pro və 17 Pro Max - məhz bu yeni prosessor üzərində qurulacaq.

Onların təqdimatı da bu ay baş tutacaq. Həmçinin bu prosessorun Samsung Galaxy S26 seriyasında da istifadə olunacağı gözlənilir və yəqin ki, Snapdragon 8 Elite Gen 5 for Galaxy adı altında təqdim ediləcək. İlk baxışdan, Snapdragon 8 Elite-dən sonra növbəti nəsil prosessorun Snapdragon 8 Elite Gen 2 adlandırılması məntiqli görünə bilərdi, lakin şirkət açıqlayıb ki, Snapdragon 8 Elite Gen 5, 8-ci seriyanın premium platformalarının beşinci nəslini ifadə edir və bu, istehlakçılar üçün şirkətin məhsul inkişafı planlarını daha asan başa düşülən edir. Snapdragon 8 prosessorları aşağıdakı ardıcıllıqla buraxılıb:

- Snapdragon 8 Gen 1

- Snapdragon 8 Gen 2

- Snapdragon 8 Gen 3

- Snapdragon 8 Elite (əslində Gen 4)

- Snapdragon 8 Elite Gen 5.

     
Qualcomm bildirib ki, yeni adlandırma sistemi həllin inkişaf mərhələlərini daha yaxşı əks etdirir və gələcək Snapdragon platformalarında da istifadə olunacaq. Şirkətin bloqunda verilən açıqlamada deyilir: “Elə görünə bilər ki, biz bir neçə nəsli buraxmışıq, amma həqiqət daha sadə və güclüdür. Snapdragon 8 Elite Gen 5 bizim 8-ci seriya premium platformalarının beşinci nəslini ifadə edir - biz yeni adlandırma və vizual identifikasiyanı təqdim etdiyimiz vaxtdan bəri. Beləliklə, ad yeni görünsə də, əslində bu, bizim möhkəmlənmiş strukturumuzun davamıdır”.