Google Chrome-a Gemini əsaslı süni intellekt agenti inteqrasiya olunacaq
22.09.2025 / Maraqlı məlumatlar
Google Gemini süni intellektinə Chrome brauzerində daha geniş imkanlar təqdim edəcək. Buraya qovluqlara, baxış tarixçəsinə, Gmail və Calendar da daxil olmaqla Google tətbiqlərindən məlumatlara çıxış daxildir. Həmçinin ünvan sətrini süni intellekt rejiminə (AI Mode) giriş nöqtəsinə çevirəcək. Yeni funksiyalar - ünvan sətrində süni intellekt rejimi və istifadəçi əvəzinə internetdə müxtəlif tapşırıqları yerinə yetirəcək Project Mariner kod adlı süni intellekt agenti yaxın həftələrdə və aylarda təqdim olunacaq. Bununla yanaşı məlumata görə, Chrome daxilində Gemini istifadəsinə qoyulmuş ödənişli məhdudiyyət aradan qaldırılacaq. İstifadəçilər xüsusi nişan vasitəsilə ənənəvi axtarış ilə süni intellekt rejimi arasında keçid edə biləcəklər, həmçinin qısa açar sözlər əvəzinə uzun kontekstli suallar verə biləcəklər.
Onlar Gemini-dən müəyyən veb-səhifənin məzmununu anlamaqda kömək almaq, müxtəlif qovluqlarla işləmək və ya bir qovluq daxilində digər əməliyyatları yerinə yetirmək - məsələn, görüş planlaşdırmaq və ya YouTube-da video axtarmaq üçün istifadə edə biləcəklər. “Biz brauzeri elə inkişaf etdiririk ki, siz internetdən bir neçə il əvvəl bizə qeyri-mümkün görünən yollarla maksimum fayda əldə edə biləsiniz. Və biz bunu Chrome-un bir çox insanın sevdiyi sürətini, sadəliyini və təhlükəsizliyini qorumaqla edirik” - deyə Google-un platformalar və cihazlara cavabdeh olan baş vitse-prezidenti Rick Osterloh bildirib. Yeni Gemini Chrome brauzerində Google-un Calendar, YouTube və Maps kimi tətbiqləri ilə daha dərin inteqrasiyaya malik olacaq. Beləliklə, istifadəçilər başqa veb-səhifəyə keçmədən bu servislərə birbaşa daxil ola biləcəklər.
Yaxın aylarda istifadəçilər agent Gemini-dən müəyyən tapşırıqları yerinə yetirməyi də xahiş edə biləcəklər - məsələn, saç kəsiminə yazılmaq və ya bir həftəlik ərzaq sifariş etmək. Əvvəllər agent funksiyaları Project Mariner adlı daxili layihənin bir hissəsi idi və əməkdaşlar arasında məşhur idi. Google həmçinin süni intellekt vasitəsilə öz brauzerində təhlükəsizliyi gücləndirib. İndi Chrome fırıldaqçı saytları, saxta uduş kampaniyalarını və kamera kimi şübhəli icazələr tələb edən resursları aşkar edəcək. Bundan başqa, süni intellekt oğurlanmış şifrələri müəyyən edə və bəzi saytlarda onları avtomatik sıfırlayaraq yenilənmiş şifrələri təhlükəsiz yaddaşda saxlaya biləcək. Google nümayəndələrinin fikrincə, bu cür funksiyalar şirkətin Microsoft Edge və Opera ilə rəqabətdə mövqelərini gücləndirir. Çünki həmin brauzerlər də süni intellekt agentinin imkanlarını inkişaf etdirir.
