Azərbaycanlı alim dünyanın ən nüfuzlu elm adamları siyahısında yer alıb
29.09.2025 / Mühüm xəbərlər
İstanbul Ticarət Universitetinin professoru, tətbiqi mexanika və kompozit konstruksiyalar sahəsində tanınmış alim Abdulla Sofiyev (Avey) növbəti dəfə dünyanın ən nüfuzlu alimləri sırasında yer alıb.
Stanford Universitetinin təşəbbüsü ilə aparılan və “Elsevier” nəşriyyatı tərəfindən 2024-cü ildə dərc olunan beynəlxalq araşdırmanın nəticələrinə əsasən, professor A.Sofiyev həm “Karyeraya təsir”, həm də “İllik təsir” göstəricilərinə görə dünyanın 2 faiz ən nüfuzlu alimləri siyahısına daxil edilib. Siyahı 2025-ci ilin sentyabr ayında açıqlanıb.
Qeyd edək ki, bu siyahıda A.Sofiyev dünyanın müxtəlif universitetlərində çalışan bütün azərbaycanlı alimlər arasında ən öndə yer almaqdadır. Bu göstərici professorun yalnız fərdi nailiyyətlərini deyil, həm də Azərbaycan elminin qlobal elm məkanında mövqeyini nümayiş etdirir. Onun araşdırmaları əsasən nanokompozit və funksional dərəcələndirilmiş materiallardan hazırlanan çoxqatlı konstruksiyaların qeyri-xətti rəqsləri, dayanıqlıq və sabitlik problemlərinə həsr olunub. Alimin 300-dən artıq elmi məqaləsi nüfuzlu beynəlxalq jurnallarda dərc edilib. Bunların 190-dan çoxu yüksək impakt faktorlu SCİ göstəricisinə malik jurnallarda işıq üzü görüb. Əsərlərinə verilmiş minlərlə istinad onun elmi nüfuzunun qlobal miqyasda tanındığının göstəricisidir.
Professor hazırda İstanbul Ticarət Universitetində fəaliyyətini davam etdirir. Bununla yanaşı, o, Azərbaycan Memarlıq və İnşaat Universiteti ilə də sıx elmi əməkdaşlıq edir. A.Sofiyev son illərdə hər iki ali məktəbdə apardığı fundamental və tətbiqi tədqiqatlarla bu ali təhsil müəssisələrinin beynəlxalq nüfuzunun yüksəlməsinə, elmi-innovativ potensialının güclənməsinə və Azərbaycan–Türkiyə akademik əlaqələrinin daha da inkişafına mühüm töhfələr verib.
