ABŞ-ın gəmiqayırma zavodlarına insanabənzər robotların inteqrasiyası planlaşdırılır
30.09.2025 / Maraqlı məlumatlar
ABŞ Gəmiçilik Bürosu (ABS) Hyustonun humanoid (insanabənzər) robotlar hazırlayan şirkəti Persona AI ilə əməkdaşlıq elan edib. Tərəfdaşlığın məqsədi - gəmiqayırma zavodlarında humanoid robotların tətbiqi və onların müxtəlif tapşırıqların icrasında istifadə olunmasıdır. Gələcəkdə bu, personalın işini yüngülləşdirəcək və istehsalın səmərəliliyini artıracaq. Xüsusi diqqət Persona AI robotlarının gəmiqayırma zavodlarının spesifikasına uyğunlaşdırılmasına yönələcək. Ənənəvi sənaye robotlarından fərqli olaraq, humanoidlər elastikliyi və hərəkətliliyi sayəsində insanlar üçün nəzərdə tutulmuş məhdud və erqonomik cəhətdən çətin məkanlarda işləyə bilirlər. ABS və Persona AI gəmilərin sertifikatlaşdırılması və təsnifatını dəstəkləmək məqsədilə məlumat toplanması üzrə birgə layihələri nəzərdə tutan qarşılıqlı anlaşma memorandumu imzalayıblar.
Məqsəd robotların zavodlarda mürəkkəb tapşırıqları təhlükəsiz şəkildə yerinə yetirməsinə imkan verən standartlar və protokollar hazırlamaqdır. ABS-in prezidenti və baş əməliyyat direktoru John McDonald vurğulayıb ki, bu əməkdaşlıq şirkətin innovasiyalara və təhlükəsizliyə sadiqliyini əks etdirir. Əməkdaşlıq həmçinin gəmilərin rəqəmsal və distant aparılan yoxlamaları üçün yeni standartların hazırlanmasına da töhfə verəcək. Bu standartlar robotlar tərəfindən toplanan məlumatların sertifikatlaşdırma və keyfiyyətə nəzarət üçün necə toplanacağı və istifadə olunacağını müəyyən edəcək, həmçinin yeni robotlaşdırılmış platformaların layihələndirilməsində istinad nöqtəsi olacaq.
Persona AI-nin baş direktoru və həmtəsisçisi Nick Radford bildirib ki, bu layihə sənaye üçün dönüş nöqtəsi deməkdir. Onun sözlərinə görə, humanoid robotlar artıq reallığa çevrilir və gəmiqayırmanın prinsiplərini, həmçinin bu sahədə innovasiyaları və rəqabəti dəyişməyə hazırdır. Persona AI vurğulayır ki, onun robotları insanların yerini almaq üçün deyil, onlara kömək etmək üçün yaradılır. Şirkət NASA-nın robotlaşdırılmış qollar sahəsindəki texnologiyalarından istifadə edir ki, bu da çevikliyi və dinamik, strukturu olmayan şəraitdə təhlükəsiz işləmə imkanını təmin edir. Belə robotlar xüsusilə yüksək kadr dövriyyəsi olan zavodlarda faydalıdır - sıravi işçilər arasında 20-22%, əsas vəzifələrdə isə 30%-dən çox. Onlar insanların yükünü azaldaraq kritik əhəmiyyətli tapşırıqları yerinə yetirə və istehsalın təhlükəsizliyini artıra bilirlər.
