Anthropic şirkəti Claude böyük dil modeli ailəsinin bu günə qədərki ən güclü versiyası olan Claude Sonnet 4.5-i təqdim edib. Tərtibatçıların sözlərinə görə, o, proqramlaşdırmaya, süni intellekt agentlərinin qurulmasına və mürəkkəb tapşırıqların həllinə yönəlib. Anthropic nümayəndələri təsdiqləyiblər ki, Sonnet 4.5 yalnız sahəyə aid bençmark testlərində lider olmayıb, həm də proqram kodunun başa düşülməsi, riyazi hesablama və kompüterin idarə olunması sahələrində nəzərəçarpacaq irəliləyiş nümayiş etdirib. Claude Sonnet 4.5 SWE-bench Verified-də - süni intellekt modellərinin proqram kodu yazmaq və təhlil etmək üzrə real bacarıqlarını ölçən sənaye testində - birinci yeri tutub. Anthropic-in məlumatına görə, Sonnet 4.5 mürəkkəb və çoxmərhələli tapşırıqlar üzərində işləyərkən 30 saatdan artıq konsentrasiyanı saxlaya bilir və bununla da əvvəlki Claude versiyalarını və yaxın rəqiblərini geridə qoyur.

OSWorld testində - süni intellektin real kompüter tapşırıqları ilə işləməsini yoxlayan sınaqda - Sonnet 4.5, Sonnet 4 versiyasının 42.2%-lik nəticəsi ilə müqayisədə 61.4% göstərici əldə edib ki, bu da son aylar ərzində məhsuldarlığın kəskin artımını göstərir. Yeni model yalnız proqramlaşdırmada deyil, başqa sahələrdə də özünü göstərib. Daxili və müstəqil testlərin nəticələrinə əsasən, Sonnet 4.5 məntiqi nəticə çıxarma və riyaziyyat tapşırıqlarında, həmçinin ixtisaslaşmış sahələrdə - maliyyə, tibb, hüquq və STEM fənlərində ciddi irəliləyiş nümayiş etdirir. Tərtibatçılar kodun generasiyası və təhlilinin keyfiyyətində, faylların idarə olunmasında və mürəkkəb hesablama əməliyyatlarının real vaxtda icrasında artımı qeyd edirlər. Həmçinin yeni təcrübi rejim - Imagine with Claude təqdim olunub: artıq süni intellekt proqram həllərini sözün əsl mənasında “ani olaraq” yarada və kodu tamamilə istifadəçinin cari sorğularına uyğunlaşdıra bilir.

Sonnet 4.5-in təqdimatı ilə eyni vaxtda şirkət Claude ekosistemində böyük yeniləmələri də açıqladı. Claude Code servisində irəliləyişin saxlanması üçün checkpoint-lər, yenilənmiş terminal və Visual Studio Code üçün nativ genişlənmə əlavə olunub. Claude tətbiqlərində indi kodla birbaşa işləmək, fayllar (cədvəllər, təqdimatlar və sənədlər daxil olmaqla) yaratmaq imkanı mövcuddur. Max abunəliyi olan istifadəçilər isə Chrome üçün genişlənmə əldə ediblər. Tərtibatçılar üçün yeni alətlər dəsti - Claude Agent SDK istifadəyə verilib. O, Claude Code-un əsasını təşkil edən eyni texnologiyalar əsasında öz ağıllı agentlərini yaratmağa imkan verir. SDK yaddaşla mürəkkəb işləmə, hüquqların idarə olunması və agentlər arasında alt tapşırıqların koordinasiyasını təmin edir - yəni istənilən tapşırıq üçün inkişaf etmiş həllərin qurulmasına şərait yaradır.

Claude Sonnet 4.5 təkcə ən bacarıqlı deyil, həm də şirkətin ən “nəzakətli” süni intellekt modeli olub: istifadəçiyə yaltaqlanma, məhdudiyyətləri aşmağa cəhd və ya zərərli sorğuları yerinə yetirmə kimi təhlükəli və arzuolunmaz davranış nümunələrinin sayı azaldılıb. İstifadəçilərin müdafiəsi çərçivəsində Anthropic çoxsəviyyəli filtrlər (AI Safety Level 3) tətbiq edir, xüsusilə kimyəvi, bioloji, nüvə və digər silah növləri ilə bağlı mövzularda. Filtrlər həm də daha dəqiq işləyir: yalnış işə düşmə halları əvvəlki versiyalarla müqayisədə 10 dəfə azaldılıb. Claude Sonnet 4.5 artıq bütün istifadəçilər üçün çat-botun veb versiyasında, eləcə də mobil tətbiqlərdə əlçatandır. Yeni süni intellekt modeli həmçinin əvvəlki qiymətlərlə (3$-dan başlayaraq milyon token üçün) API vasitəsilə də mövcuddur. Claude Code və Agent SDK-nın yeni imkanları isə bütün tərtibatçılar və korporativ müştərilər üçün əlçatandır.