Süni intellekt Almaniyanın internet sənayesini stimullaşdırır
01.10.2025 / Maraqlı məlumatlar
Alman internet iqtisadiyyatı sürətlə inkişaf edir.
AZƏRTAC “Tagesschau” informasiya portalına istinadla xəbər verir ki, Almaniya İnternet Sənayesi Assosiasiyasının (Eco) sifarişi ilə “Arthur D.Little” konsaltinq firmasının apardığı araşdırmaya əsasən, Almaniyanın internet iqtisadiyyatının növbəti beş il ərzində illik 9,7 faiz artacağı gözlənilir. Beləliklə, gəlirlərin bu il 245 milyard avrodan 2030-cu ilə qədər 389 milyard avroya yüksələcəyi ehtimal olunur.
Tədqiqatda bu artımın iki əsas səbəbi müəyyən edilir. Birincisi, rəqəmsallaşma həyatın və işin bütün sahələrinə nüfuz edir. İkincisi, şirkətlər və istehlakçılar süni intellekt texnologiyalarından getdikcə daha çox istifadə edirlər. Süni intellektin istifadəsi müasir dinamikanın əsasını təşkil edir və yeni biznes modelləri yaradır.
Müsbət proqnozlara baxmayaraq, “Eco” struktur defisit və iqtisadi bumun siyasi səhvlər səbəbindən iflasa uğraması riski barədə xəbərdarlıq edir. Əsas problem rəqəmsal infrastrukturun, xüsusən də məlumat email mərkəzlərinin çox böyük çatışmazlığıdır. Tədqiqatın müəllifləri proqnozlaşdırırlar ki, 2030-cu ilə qədər Almaniyada İT mərkəzlərinə qoşulma gücü təxminən 50 faiz artaraq 2,4-dən 3,7 giqavata çatacaq. Bununla belə, onlar sənaye tərəfindən tələbin də ən azı 3-5 dəfə artaraq məhz 12 giqavata çatacağını gözləyirlər. Bu, Almaniyanın Beynəlxalq rəqabətdə daha da geriləməsi təhlükəsi yaradır.
ABŞ artıq Almaniyadan 20 dəfə çox gücə malikdir. Araşdırmaya görə, əlavə güc olmadan hesablama yükləri xaricə keçiriləcək, bu isə Almaniyanın rəqəmsal suverenliyini təhlükə altına salacaq. İnternet Assosiasiyası hesab edir ki, infrastruktur boşluqları, ilk növbədə, fiber-optik şəbəkələrin ləng inkişafı, kiçik və orta müəssisələr arasında rəqəmsallaşmada tərəddüd və platformalar sahəsində təcrübə çatışmazlığı ilə bağlıdır.
“Eco”nun baş direktoru Oliver Süme xəbərdarlıq edib ki, qətiyyətli siyasi hərəkətlər olmasa, artım bumu yox ola bilər. “Süni intellekt və avtomatlaşdırma hesablama gücünə və yüksəksürətli şəbəkələrə böyük tələbat yaradır. Bununla belə, Almaniyadakı mövcud şərait bazarı lazımi güclərlə vaxtında təmin etməyə imkan vermir.
Almaniyada sənaye ehtiyacları üçün yüksək elektrik enerjisi qiymətləri kilovat-saat üçün təxminən 0,23 sent olmaqla Aİ orta qiymətindən 25 faiz çoxdur. Bu, ciddi ərazi yerləşdirmə problemi yaradır və operatorların beynəlxalq bazarda rəqabət qabiliyyətini azaldır.
