Kosmosdan gələn “Wow” siqnalı barədə yeni iddia
03.10.2025 / Maraqlı məlumatlar
1977-ci ildə Yerə çatan və sirr olaraq qalan “Wow” siqnalı ilə bağlı araşdırmalar davam edir.
Metbuat.az xəbər verir ki, Harvard universitetinin astrofiziki Avi Loeb, siqnalın ulduzlararası obyekt “3I/ATLAS”dan gələ biləcəyini irəli sürüb. Qeyd edək ki, Loeb əvvəllər bu obyektin adi bir kometa deyil, süni şəkildə yaradılmış gəmi ola biləcəyini irəli sürmüşdü. Məlumata görə, “Wow” siqnalı 1977-ci ildə Ohayo Dövlət universitetinin “Big Ear radio” teleskopu tərəfindən 72 saniyə ərzində qeydə alınıb. Loebin yeni araşdırmasına görə, siqnalın qeydə alınmasından cəmi bir neçə gün əvvəl “3I/ATLAS” səmanın eyni bölgəsinin yaxınlığından keçib. Bunun təsadüfən baş vermə ehtimalı cəmi 0,6 faizdir. Loeb iddia edib ki, “Hubble” teleskopu tərəfindən qeydə alınan görüntülər “3I/ATLAS”ın öz işığını istehsal etdiyini nümayiş etdirib. O bildirib ki, bu, nüvə enerjisi ilə işləyən gəmi ola bilər.
Qeyd edək ki, alimlərin əksəriyyəti Avi Loebun iddiaları ilə razılaşmır. Onlar hesab edir ki, “3I/ATLAS” sadəcə qeyri-adi kometadır.
